პირველი მარტიდან საჯარო მოხელეებსა და განათლების სფეროში დასაქმებულ პირებს, მასწავლებლებს „ჯეოსელის“ ქსელმა ინტერნეტის ტარიფი გაუძვირა. თუკი მასწავლებლებს პირველი კატეგორიის ნომრებზე (ნომერი, რომლითაც თავად პედაგოგი სარგებლობდა, მეორე კატეგორია – როცა ნომრით პედაგოგის ოჯახი სარგებლობდა) შესაძლებლობა ჰქონდათ 4.99 ლარად 16 გბ ინტერნეტი შეეძინათ, ახალი პირობების მიხედვით, მათ ამ სერვისის გამოყენების შესაძლებლობა აღარ ექნებათ.
პედაგოგებს, 11.50 ლარად 10 გბ ინტერნეტის შეძენა შეეძლებათ, 35.50 ლარად კი – 30 გბ ინტერნეტის.
„ჯეოსელის“ შეცვლილ პირობებს პედაგოგები სოციალურ ქსელში გამოეხმაურნენ. ისინი წერენ, რომ უარს იტყვიან „ჯეოსელის“ მომსახურებაზე, თუკი კომპანია ინტერნეტსერვისებზე ფასებს გააძვირებს.
კითხვაზე, რამ გამოიწვია ტარიფების ცვლილება, „ჯეოსელის“ საზოგადოებასთან ურთიერთობის სამსახურში პასუხობენ, რომ ცვლილება სახელმწიფოს შეთავაზებულმა სატენდერო პირობებმა გამოიწვია.
ამავე კითხვაზე სახელმწიფო შესყიდვების სააგენტო კომენტარს არ აკეთებს.
27 თებერვალს, გავრცელდა ინფორმაცია, რომ საჯარო მოხელეებს ინტერნეტის საფასური 3-ჯერ გაუძვირდებოდათ.
ინტერნეტმომსახურებაზე სამჯერ გაზრდილი ზედა ზღვრული ტარიფების შესახებ 26 თებერვალს გამოცხადებულ კონსოლიდირებული ტენდერის დოკუმენტაციაშია ასახული.