იერუსალიმში, მაცხოვრის აღდგომის ტაძარი პროტესტის ნიშნად დაიხურა

0
470
იერუსალიმში მდებარე მაცხოვრის აღდგომის ტაძრის დახურვა კათოლიკური, ბერძნული მართლმადიდებლური და სომხური ეკლესიის წარმომადგენლებმა პროტესტის ნიშნად მიიღეს.კონფესიათა წარმომადგენლების გაღიზიანება ისრაელის საგადასახადო კოდექსში ცვლილებებსა და ახალი კანონს უკავშირდება, რომლის თანახმადაც, ხელისუფლებას ეკლესიისთვის მიწის ჩამორთმევის შესაძლებლობა მიეცემა.ერთობლივ განცხადებაში აღნიშნულია, რომ განხილვის სტადიაზე არსებული კანონპროექტი „დისკრიმინაციული და რასისტულია“, მიღების შემთხვევაში ის ხელისუფლებას ეკლესიის მიწების ექსპროპრიაციის საშუალებას მისცემს. ასევე ახალი კანონი გაართულებს ეკლესიის მიერ მიწების რეალიზაციას. კონფესიის წარმომადგენლები უკმაყოფილებას ასევე გამოთქვამენ ეკლესიის საკუთრებაზე გადასახადების დაწესების შემოღების მცდელობის გამო.პროტესტის შედეგად, ისრაელის საპარლამენტო კომიტეტმა კანონპროექტის განხილვა ერთი კვირით გადადო. კანონპროექტის ერთ-ერთი ავტორის, რეიჩელ აზარიას განმარტებით, ეკლესიის მიწებს საფრთხე არ ემუქრება. კანოპროექტი ეხება მხოლოდ იმ ნაწილს, როდესაც მიწაზე უფლება მესამე მხარეს გადაეცემა, კერძოდ კი, მიწებს, რომელიც 2010 წლის შემდეგ დეველოპერებს გადაეცათ ან მომავალში გადაეცემათ.
ეს 1900 წლის შემდეგ პირველი შემთხვევაა, როდესაც აღდგომის ტაძრის კარი პოლიტიკური მიზეზით დაიხურა. ამ დროისთვის უცნობია, როდის გახსნიან მას. ტაძარი რამდენიმე კონფესიის დაქვემდებარებაშია, მათ შორის კათოლიკური, ბერძნული მართლმადიდებლური, სომხური, ასევე კოპტური, სირიული და ეთიოპიური.
იერუსალიმის მერის განცხადებით, საგადასახადო კოდექსში ეკლესია გამონაკლისად რჩება, რის გამოც ქალაქი საეკლესიო ქონების გადასახადიდან 650 მილიონი შეკელს (168 მლნ. დოლარს) ვერ იღებს. აღნიშნული თანხა, ეკლესიის საკუთრებაში არსებული სასტუმროების, შენობა-ნაგებობებისა და კომპანიებიდან მიღებული შემოსავლის ნაწილია, რომელიც უშუალოდ რელიგიური დანიშნულების არ არის.
 
 
წინა სტატიაზუგდიდის რაიონულმა სასამართლომ ბექა რუსიას საქმეზე ბრალდებულ დავით ჯალაღანიას 3 წლით თავისუფლების აღვეთა მიუსაჯა
შემდეგი სტატიაკანონპროექტი: უნებართვოდ მგზავრის გადაყვანისთვის ტაქსის მძღოლი 200 ლარით დაჯარიმდება
ტელეკომპანია ოდიშის საინფორმაციო სამსახური