სამეგრელოს ისტორიაში პირველად ლგბტ თემატიკაზე ანდრო დადიანის პერფომანსი „ბალიშის პირი“ „თანასწორობის მოძრაობის“ ზუგდიდის ოფისმა წარმოადგინა. პერფომანსისთვის მუსიკა კომპოზიტორმა ანრი კიკნაველიძემ შექმნა. მუსიკა, სურნელი, ბალიში და მისი სიღრმიდან წამოსული პოეტის ხმა განსაკუთრებით შთამბეჭდავი აღმოჩნდა, მონაწილეებმა აღნიშნეს, რომ ეს იყო სამყარო, სადაც იძირები და ხარ იქ, სადაც სინამდვილეში არ ყოფილხარ, თუმცა ავტორის მიერ ეს იმდენად გრძნობით არის გადმოცემული, რომ ზუსტად ისე გამოგზაურებს, როგორც ლექსად აკინძული სიტყვები გიყვებიან. პერფომანსი ავტორის ინსპირაციის წყარომ შეასრულა, რომელიც ყვება, რომ ეს არის საოცარი შეგრძნება, მაშინ როცა, ავტორი აქ არ არის და მისივე სიტყვებს ისე გრძნობ, თითქოს შენს გვერდით იყოს. „თანასწორობის მოძრაობის“ ზუგდიდის ორგანიზაციის ხელმძღვანელი ემზო კვარაცხელია "ოდიშინიუსთან" ამბობს, რომ ეს იყო მნიშვნელოვანი მოვლენა , რადგან სწორედ რომ რეგიონებში უნდა იყოს ნაჩვენები მსგავსი წარმოდგენები ლგბტ თემებზე, რათა დაიძლიოს ჰომოფობიის შიში, რომელიც ძალიან მწვავედ დგას აქ.
ანდრო დადიანი პირველი ქართველი ქვიარ პოეტია,რომელსაც დამაინტრიგებელი თემების გარდა საინტერესო და დინამიკური თხრობის სტილი აქვს, მისი ტექსტები ექსცენტრიული, ეროტიკული კადრების მეშვეობით გასაოცარ პასაჟებს ქმნის, სადაც ღიად საუბრობს უკიდურესად პირად საკითხებზე. აქამდე ქართული პოეზიისათვის უცხო გულწრფელობითა და ფორმებით. რაც შეეხება „ბალიშის პირს“, სულ მალე გამოვა ამ პერფორმანსის ირგვლივ გადაღებული გურამ საყვარელიძის დოკუმენტური ფილმი "სახელის უკან". ავტორი წერს, რომ ამ ფილმით უფრო დაწვრილებით მოყვება დამოკიდებულებებს, შიშებს, შთაბეჭდილებებს იმ მონსტრის მიმართ, რასაც ჰომოფობია ჰქვია და რომელიც გვაიძულებს ვიცხოვროთ მეორე ცხოვრებით – საკუთარი ცხოვრებით საკუთარი სახელის მიღმა.
