ექსპერტები ევროპასთან უვიზო მიმოსვლის შეფერხების თავიდან ასაცილებლად ხელისუფლებას რეკომენდაციებით მიმართავენ. მათი ნაწილი დარწმუნებულია, რომ საფრთხე არსებობს და უვიზო რეჟიმი გადასარჩენია.
აღმოსავლეთ პარტნიორობის სამოქალაქო საზოგადოების ფორუმის ეროვნული პლატფორმის თავმჯდომარე, კახა გოგოლაშვილი, აღნიშნავს, რომ პრობლემების აღმოფხვრისთვის მეტი პრევენციული ღონისძიებების გატარებაა საჭირო.
„როგორც ჩანს, საჭირო არის მეტი დიპლომატია, მეტი დიპლომატია, მეტი პრევენციული მუშაობა იმისთვის, რომ ევროკავშირის წევრმა რომელიმე ქვეყანამ არ მოითხოვოს უვიზო რეჟიმის გაუქმება საქართველოსთან,“ – განაცხადა კახა გოგოლაშვილმა.
საქართველოს სტრატეგიული ანალიზის ცენტრის დამფუძნებელი, თორნიკე შარაშენიძე, ხელისუფლებას ეკონომიკური მდგომარეობის გაუმჯობესებისკენ მოუწოდებს.
„ეს პრობლემა რომ მოგვარდეს, გზა არის ეკონომიკური მდგომარეობის გაჯანსაღება, სოციალური პრობლემების მოგვარება. სამწუხაროდ, ახლა ამის გაკეთების თავი ამ მთავრობას კიდევ დიდხანს რომ არ ექნება, ფაქტია,“ – განაცხადა შარაშენიძემ
,,პრობლემები, რომლებმაც შესაძლოა, ევროპასთან უვიზო მიმოსვლა შეაფერხოს, მთავარობამაც აღიარა. მთავარი თავშესაფრის მაძიებელთა რაოდენობის ზრდის ტენდენცია და საქართველოს მოქალაქეების მონაწილეობით ჩადენილი კრიმინალური ფაქტებია.
ჩვენ ვითვალისწინებთ ყველა იმ წუხილს, რომელიც შეიძლება ევროკავშირის წევრ ქვეყნებს ჰქონდეთ ვიზალიბერალიზაციასთან დაკავშირებით,'' განაცხადა ვიცე-პრემიერმა, საგარეო საქმეთა მინისტრმა მიხეილ ჯანელიძემ. მისი განმარტებით, დღეს ნამდვილად არ არის მოცემულობა, როდესაც შეიძლება ამოქმედდეს ვიზალიბერალიზაციის შეჩერების მექანიზმი, მაგრამ აუცილებელია საქართველოს მოქალაქეებმა ყურადღება მიაქციონ რიგ რეგულაციებს და არ დაარღვიონ ისინი.
„აუცილებელია, რომ სტატისტიკას, რომლითაც გაიზარდა თავშესაფრის მაძიებლები, ჩვენ განსაკუთრებული ყურადღება მივაქციოთ. სწორედ ამისთვის გაიმართა პრემიერ-მინისტრისა და მთავრობის წევრების სპეციალური შეხვედრა, სადაც განვიხილეთ კონკრეტული გეგმები, რომელიც უკავშირდება პირველ რიგში ჩვენი მოსახლეობის ინფორმირებულობას, თუ რა საფრთხეებთან არის დაკავშირებული მათი არალეგალური ვიზიტები ევროკავშირში და ასევე თავშესაფრის არაკანონიერი მოთხოვნები. ამით ისინი ფინანსურ ზიანსაც იღებენ და ასევე სხვა პრობლემებთანაც არის დაკავშირებული მსგავსი ქმედებები. ძალიან აქტიურად ვიმუშავებთ შინაგან საქმეთა სამინისტროს დახმარებით, ჩვენს პარტნიორ ქვეყნებთან ორგანიზებული დანაშაულის სფეროში, ასევე ვიმუშავებთ შიდა მექანიზმებზე, რათა არ მოხდეს მთელი რიგი დარღვევები“, – განაცხადა მიხეილ ჯანელიძემ ჟურნალისტებთან გუდაურში, სადაც დიპლომატების სათხილამურო შეჯიბრი მიმდინარეობს.