,,გიხაროდეთ ყველას – დღეს სიკეთე არის დასჯადი'' – განუცხადა დღეს ჟურნალისტებს თბილისის საქალაქო სასამართლოში ფონდ „იავნანას“ თანხების გაფლანგვის საქმესთან დაკავშირებით დაკითხვაზე მისულმა საოპერო მომღერალმა პაატა ბურჭულაძემ.
„დღეს ისტორიული დღეა. გიხაროდეთ ყველას, რომ დღეს სიკეთე არის დასჯადი და უნდა გამოკითხონ ის ადამიანი, ვისაც ამდენი სიკეთე აქვს გაკეთებული. მაგრამ, რა ვქნათ, ვნახოთ. იმედი ვიქონიოთ, რომ სამართალი იქნება“, – განაცხადა ბურჭულაძემ.
გამოძიებას პაატა ბურჭულაძის, როგორც ფონდის პრეზიდენტის მიმართ არაერთი კითხვა აქვს ხარჯების მიზნობრიობასთან დაკავშირებით, კერძოდ, კითხვები კონკრეტული მგზავრობის დაფინანსების, ქონების შეძენისა და სხვა ხარჯების მიზნობრიობასთან დაკავშირებით – ამის შესახებ ჟურნალისტებს განუცხადა პროკურორმა მაია ჯვარშეიშვილმა, რომელიც ფონდ "იავნანას" დამფუძნებლის მოწმის სახით გამოკითხვის პროცესში მონაწილეობს. – საუბარია რამდენიმე ასეული ათასი ლარის ხარჯვის მიზნობრიობაზე. დღეს სწორედ ამ საკითხებზე მოხდება მისი მოწმის სახით გამოკითხვა მაგისტრ მოსამართლესთან თავად პაატა ბურჭულაძის მოთხოვნის შესაბამისად."
პაატა ბურჭულაძე აცხადებს, რომ პროკურატურასთან მასაც აქვს შეკითხვები. რომელსაც დღეს დასვამს.