საქართველოს ყოფილმა პრეზიდენტმა მიხეილ სააკაშვილმა ფრანგულ გამოცემა Liberation- ს ინტერვიუ მისცა.
„უკრაინა ვერ შესძლებს გადარჩენას ძლიერი ეკონომიკური ზრდის გარეშე. მთავრობა არაპოპულარულია. ზოგიერთ რეგიონებში ადგილი აქვს ძლიერ სეპარატისტულ ტენდენციებს. ეკონომიკური ზრდის გარეშე სამოქალაქო მშვიდობის შერყევისა და ქვეყნის ბალკანიზაციის რისკები რეალურია“, – განაცხადა მიხეილ სააკაშვილმა.
მისი თქმით, მის პოლიტიკურ პარტიას „ახალი ძალების მოძრაობას“ პარლამენტში შესვლა შეუძლია.
„როდესაც შევუტიე პოროშენკოს, რომელიც ქვეყანაში ცვლილებებს ბლოკავს, ხალხი გარეთ გამოვიდა მანიფესტაციებზე. ბოლო გამოკითხვების თანახმად, ჩემს პარტიას 6-7%-იანი მხარდაჭერა აქვს. ჩვენ შეგვიძლია პარლამენტში შევიდეთ. ეს რეიტინგი არც თუ ისე ცუდია პარტიისთვის, რომელიც ექვსი თვის წინ არც კი იყო პოლიტიკურ რუკაზე. ეს ცხადყოფს , რომ პოროშენკო საკმაოდ სუსტია. ის ცდილობს ყველაფერი გააკონტროლოს, თუმცა ჩემზე თავდასხმით მან მე ავანსცენაზე გამომიყვანა“, – აღნიშნა საქართველოს ყოფილმა პრეზიდენტმა.
მიხეილ სააკაშვილმა ასევე განაცხადა, რომ მისი საბოლოო მიზანი „წარმატებული უკრაინაა“.
„მზად ვარ საჯაროდ დამწვან, თუ ეს უკრაინას წაადგება. მე არ შემიძლია საპრეზიდენტო არჩევნებზე ჩემი კანდიდატურის წარდგენა. მაგრამ, თუ მე დავეხმარები პოლიტიკურ სცენაზე გამაერთიანებელი და ახალი ფიგურის გამოჩენას, ეს დიდი წარმატება იქნება. ჩემი საბოლოო მიზანია – წარმატებული უკრაინა. თუ უკრაინა წარმატებას ვერ მიაღწევს ან სტაგნაციაში დარჩება, ვლადიმერ პუტინი გაანადგურებს უკრაინას. მთლიანად რეგიონი, მათ შორის საქართველო დამოუკიდებელი გეოპოლიტიკური სივრციდან გაქრება. ჩემთვის ეს შანსია პოსტსაბჭოთა სივრცეში მეორე ქვეყანა წარმატების ისტორიად ვაქციო. რაც უნდა მოხდეს, მე ბოლომდე ვიბრძოლებ“, – დასძინა მიხეილ სააკაშვილმა.