გადასცემს თუ არა საქართველო დემირელის სკოლების მენეჯერს თურქეთის რესპუბლიკას – მუსტაფა ემრე ჩაბუქის ექსტრადირებაზე გადაწყვეტილება დღეს, საქალაქო სასამართლომ უნდა მიიღოს. პროკურატურამ პირველ ინსტანციას ექსტრადირების დასაშვებობასთან დაკავშირებით უკვე მიმართა.
ადვოკატის ინფორმაციით, სასამართლოს გადაწყვეტილების გამოცხადების შემდეგ, ბრძანება ექსტრადირებასთნ დაკავშირებით, იუსტიციის მინისტრმა უნდა გამოსცეს.
განკარგულებაზე ხელის მოწერის შემთხვევაში, სასამართლოს გადაწყვეტილების აღსრულება დაუყოვნებლივ მოხდება.
„ჩვენ გვაქვს ჩვენი დასაბუთებული წერილობითი პოზიცია, რომელიც გამყარებულია მთელი რიგი მტკიცებულებებით, წარვუდგენთ სასამართლოს და შემდეგ დაველობით სასამართლოს გადაწყვეტილებას,“ – აცხადებს ადვოკატი სოსო ბარათაშვილი.
ჩაბუქის საქმესთან დაკავშირებით, კომენტარი გააკეთა სახალხო დამცველმა ნინო ლომჯარიამ. მისი თქმით, იმ შემთხვევაში, თუკი ჩაბუქის ექსტრადირება მოხდება, ამით საქართველო დაარღვევს საერთაშორისო და ადგილობრივი კანონმდებლობის პრინციპებს.
„მიგვაჩნია, რომ არსებობს სათანადო გარემოებები იმისთვის, რათა არ მოხდეს პირის ექსტრადირება თურქეთის რესპუბლიკაში. ვფიქრობთ, რომ ძალიან მაღალია რისკი იმისა, რომ ის დაექვემდებაროს წამებას და არაადამიანურ მოპყრობას, ასევე არასამართლიან სასამართლო განხილვას, ასევე პოლიტიკური ნიშნით დევნას,“ – განაცხადა ნინო ლომჯარიამ.