საქართველოს საგარეო საქმეთა სამინისტროს ცნობით, დღეს ბრიუსელში საქართველო-ევროკავშირის ასოცირების საბჭოს სხდომა გაიმართება.
ქართულ დელეგაციას პრემიერ-მინისტრის გიორგი კვირიკაშვილი ხელმძღვანელობს. ბრიუსელში მასთან ერთად იმყოფება საქართველოს ვიცე-პრემიერი, საგარეო საქმეთა მინისტრი მიხეილ ჯანელიძე.
სამინისტროს ინფორმაციით, ასოცირების საბჭოს ფარგლებში განხილულ იქნება ორმხრივი ურთიერთობები, საქართველოში მიმდინარე რეფორმები, რომელიც უკავშირდება საქართველოს ევროპულ ინტეგრაციას და სხვა მნიშვნელოვანი საკითხები.
ბელგიის სამეფოსა და ლუქსემბურგის დიდ საჰერცოგოში საქართველოს ელჩმა და ევროკავშირთან საქართველოს მისიის ხელმძღვანელმა ნატალი საბანაძემ გამოჰყო სამი ძირითადი მიმართულება, რაზეც საბჭოს ფარგლებში გამახვილდება ყურადღება.
ასოცირების იმპლემენტაცია; დახმარების ახალი პაკეტი 2017-2020 წლისთვის, რომელიც შეეხება ეკონომიკურ განვითარებას, სავაჭრო ურთიერთობების გაღრმავებას; და უსაფრთხოების საკითხი.
,,ეს ტრადიციულად ძალიან მნიშვნელოვანია. ჩვენ დავიწყეთ სტრატეგიული დიალოგი უსაფრთხოების თემაზე და ამაზე იქნება საუბარი. განიხილება ასევე კონფლიქტი და კონფლიქტის მოგვარების თემა და ზოგადად უსაფრთხოების სიტუაცია რეგიონში,“ – განაცხადა ნატალი საბანაძემ.