ზუგდიდში აქციის მონაწილეები პოლიციის სამმართველოსთან დაკავებული მოვაჭრის გათავისუფლებას ითხოვენ. მათ სამმართველოს უფროსი კობა ხარებავა და საკრებულოს თავმჯდომარე მამუკა წოწერია შეხვდნენ.
მამუკა წოწერიამ გარემოვაჭრეებს განუცხადა, რომ მერიის მიერ შეთავაზეული ფართები და საშეღავათო პერიოდი კვლავ ძალაშია. მისი თქმით, მერიის პოზიცია უცვლელია, რაც გარევაჭრობის აკრძალვას ეხება. ამ განცხადებას გარემოვაჭრეების პროტესტი მოჰყვა.
გარემოვაჭრეები ამბობენ, რომ ქალაქის სხვა ტერიტორიებზე გარევაჭრობა დაშვებულია, რაც შეეხება ალტერნატიულ ფართებს, ისინი ამას არ დათანხმდებიან.
რაც შეეხება დაკავებულ გარემოვაჭრეს, პოლიციის სამმართველოს უფროსმა აქციის მონაწილეებს განუცხადა, რომ მისი გათავისუფლება მას შემდეგ მოხდება, რაც ადმინისტრაციული წესით ჯარიმა დაეკისრება. ამ განცხადებას გარემოვაჭრეების პროტესტი მოყვა.
პოლიციის სამმართველოსთან ერთმანეთს ენმ-ის ადგილობრივი ორგანიზაციის თავმჯდომარე ანა წითლიძე და პოლიციის უფროსი სიტყვიერად დაუპირისპირდნენ. კობა ხარებავამ „ნაციონალური მოძრაობის“ წევრს უთხრა, რომ ის გარემოვაჭრეებთან სასაუბროდ მივიდა და არა წითლიძესთან.