საქართველოს პარლამენტის ნდობის ჯგუფის სხდომაზე საქართველოს თავდაცვის სამინისტროში და საქართველოს სასჯელაღსრულებისა და პრობაციის სამინისტროში სახელმწიფო აუდიტის სამსახურის მიერ ჩატარებული შემოწმების ანგარიშის მოსმენა მიმდინარეობს.
შეხვედრაზე მოწვეულია სახელმწიფო აუდიტის სამსახურის გენერალური აუდიტორი და უწყების სხვა პასუხისმგებელი პირები.
თავდაცვისა და უშიშროების კომიტეტის თავმჯდომარის, ირაკლი სესიაშვილის განმარტებით დოკუმენტში, საგანგაშო ფაქტი არ დაფიქსირებულა.
"მქონდა უკვე საუბარი თავდაცვის მინისტრთან, ბატონ ლევან იზორიასთან. მთელი რიგი პრობლემებია გამოსწორებული, ამიტომ ეს ანგარიში ჩვენთვის არის ძალიან მნიშვნელოვანი იმ თვალსაზრისით, რომ როდესაც უკვე შემდგომში თავდაცვის და სასჯელაღსრულების მინისტრებს დავიბარებთ და მოვისმენთ მათ ანგარიშებს, ჩვენ მათ შორის გავითვალისწინებთ იმ რეკომენდაციებს, რომლებიც აღნიშნულია აუდიტის ანგაიშში."- განაცხადა ირაკლი სესიაშვილმა.
სხვაგვარი შეფასებები კეთდება ოპოზიციაში.
,,აუდიტის დასკვნა ცალსახად ადასტურებს, რომ წლების განმავლობაში თავდაცვის სფეროში გამოყოფილი საბიუჯეტო სახსრების მნიშვნელოვანი ნაწილი, სამწუხაროდ, არ ხმარდებოდა ქვეყნის თავდაცვისუნარიანობის გაზრდას, – განაცხადა "ევროპული საქართველოს" წევრმა, დეპუტატმა ირაკლი აბესაძემ პარლამენტში ნდობის ჯგუფის სხდომის დაწყებამდე.- აღნიშნული იძლევა იმის საშუალებას განვაცხადოთ, რომ ოპოზიციის მიერ წლების განმავლობაში გაკეთებული პოლიტიკური შეფასება, რომ "ქართული ოცნების" პოლიტიკა თავდაცვის სფეროში მცდარია, ზოგ შემთხვევაში კი მავნებლური.''
მისი თქმით, აუდიტის დასკვნა მათ შორის, სასჯელაღსრულებისა და პრობაციის სამინისტროს შეთხვევაშიც შეიძლება იწვევდეს კითხვის ნიშნებს და ეს ანგარიშები სამართალდამცველმა ორგანოებმა უნდა შეისწავლონ.