თავშესაფრის მინიჭების ევროპული სააგენტოს (EASO) მიერ გავრცელებული სტატისტიკური მონაცემების მიხედვით, 2016 წელთან შედარებით ევროკავშირის წევრ ქვეყნებში თავშესაფრის მაძიებელი საქართველოს მოქალაქეების რიცხვი 35%-ით გაიზარდა.
სააგენტოს ინფორმაციით, 2017 წელს საერთო ჯამში, ევროკავშირის წევრ ქვეყნებში თავშესაფარი დაახლოებით 707 ათასმა უცხოელმა მოითხოვა, მაშინ როდესაც 2016 წელს ეს რიცხვი 1,3 მილიონს შეადგენდა, ასე რომ, ყველა ქვეყნის მოქალაქეთაგან ევროკავშირში თავშესაფრის მაძიებელთა საერთო რიცხვი 2017 წელს 43%-ით შემცირდა.
EASO-ს ინფორმაციით, გასულ წელს ყველაზე მეტი მოთხოვნა სირიის მოქალაქეებისგან დაფიქსირდა, ისინი პირველ ადგილს უკვე მეხუთე წელია ინარჩუნებენ. ამასთან, წინა წელთან შედარებით თავშესაფრის მაძიებელი სირიის მოქალაქეების რიცხვი 69%-ით შემცირდა.
სირიის გარდა პირველ ათეულში ერაყი, ავღანეთი, ნიგერია, პაკისტანი, ერიტრეა, ალბანეთი, ბანგლადეში, გვინეა და ირანი მოხვდნენ.