რიკოთზე მომხდარმა ავარიამ, რომელსაც 6 ადამიანის სიცოცხლე ემსხვერპლა, სრულიად საქართველო შეძრა.
მსუბუქ ავტომობილში, რომელსაც ტრაილერმა გადაუარა, ერთი ოჯახის რამდენიმე წევრი და მათი ახლო ნათესავები ისხდნენ, მათგან 5 ადგილზე გარდაიცვალა, ერთი კი – საავადმყოფოში მიყვანის შემდეგ. მსუბუქი ავტომანქანის მძღოლი გადარჩა, ის ხაშურის საავადმყოფოში მსუბუქი დაზიანებებით შეიყვანეს და მალევე გაწერეს.
გარდაცვლილები უახლოესი ნათესავები არიან, ქანთარიების და ვაჩანძეების ოჯახის წევრები, და-ძმა როლანდ და მზიკო ქანთარიები, ასევე როლანდ ქანთარიას მეუღლე ვიკა ლეჟავა, მათი მცირეწლოვანი გოგონა ბარბარე და მათი ნათესავები, დედა-შვილი ნონა და გიორგი ვაჩანძეები. გარდაცვლილები დევნილები იყვნენ , გალის სოფელ ნაბაკევიდან, ამჟამად თბილისში ცხოვრობდნენ და მუშაობდნენ.
ისინი დასავლეთ საქართველოში ნათესავის ქორწილში იმყოფებოდნენ და ავარია სწორედ იმ დროს მოხდა, როდესაც თბილისში ბრუნდებოდნენ.
ერთერთი გარდაცვლილი ორსულად იყო… და-ძმა, მზიკო და როლანდი ბებიამ გაზარდა, დედა არ ჰყავდათ, ადრე დაობლდნენ, გარდაცვლილ ცოლ-ქმარს როლანდ ქანთარიას და ვიკა ლეჟავას ორი შვილი ჰყავდათ, ერთი თბილისში დატოვეს ბებიასთან და ქორწილში წავიდნენ. თუ რამ სანუგეშო შეიძლება იყოს ასეთი ტრაგედიის შემდეგ, სწორედ ეს არის.