გავრცელებული ინფორმაციით, პანკისის მოსახლეობა დღეს აქციის გამართვას გეგმავს. ადგილობრივები კიდევ ერთხელ მოითხოვენ დუისში ჩატარებული სპეცოპერაციის მონაწილე პირებისა და მათი ხელმძღვანელების დასჯას.
"უნდა მოვითხოვოთ სიმართლის დადგენა, რომ უდანაშაულო ბავშვი გაწირა ამ სახელმწიფომ. ვინც ეს ოპერაცია დაგეგმა, შეადგინა და ვინც ესროლა, სასამართლოს წინაშე წარდგნენ და კანონიერად დაისაჯონ," – განაცხადა თემირლან მაჩალიკაშვილის დედამ მედიკო მარგოშვილმა.
დღესვე უნდა გავრცელდეს უხუცესების განცხადება, თუმცა მის კონკრეტულ შინაარსზე ადგილობრივები წინასწარ არ საუბრობენ.
პარალელურად, დღესვე ოჯახის მიერ დაქირავებული ექსპერტები, მაჩალიკაშვილების სახლში, ბალისტიკურ ექსპერტიზას ჩაატარებენ.
"ბალისტიკური ექსპერტიზის პასუხი, რომელიც უკვე მოვიდა და წარმოდგენილია მოწინააღმდეგე მხარის მიერ, ჩვენ ცხადია, ეჭვქვეშ ვაყენებთ, არ ვენდობით ამგვარ დასკვნებს თუ არ იქნება ჩვენს მიერ გადამოწმებული," – აცხადებს თემირლან მაჩალიკაშვილის ოჯახის ადვოკატი მარიამ კუბლაშვილი.