ედუარდ შევარდნაძე მე-20 საუკუნის ერთ-ერთი გამორჩეული პოლიტიკოსია, რომელმაც მონაწილეობა მიიღო ცივი ომისა და საბჭოთა სისტემის დემონტაჟში,- ასე ეხმიანება საქართველოს პრეზიდენტი გიორგი მარგველაშვილი საქართველოს მეორე პრეზიდენტის, პოლიტიკოსისა და სახელმწიფო მოღვაწის ედუარდ შევარდნაძის 90 წლის იუბილეს.

 

მარგველაშვილმა შევარდნაძის ღვაწლი გაიხსენა და აღნიშნა, რომ მის სახელთანაა დაკავშირებული ევროპაში ხელოვნურად აღმართული კედლების ნგრევა, გერმანიის გაერთიანება და ახალი ევროპის წარმოქმნა.

 

"საქართველოს მეორე პრეზიდენტი სერიოზულ როლს თამაშობდა ქართული სახელმწიფოებრიობის ჩამოყალიბებაში, ახალი საქართველოს შექმნაში და ქვეყნის დასავლური კურსით განვითარების საქმეში. 

ედუარდ შევარდნაძე იყო სახელმწიფო ლიდერი, ვინც საქართველოს ევროპულ და ევროატლანტიკურ პერსპექტივაზე დაიწყო საუბარი. მის სახელს უკავშირდება საქართველოს გაწევრიანება გაერთიანებული ერების ორგანიზაციაში, მსოფლიო მნიშვნელობის ენერგეტიკული და სატრანსპორტო პროექტების განხორციელება, საქართველოში სიკვდილით დასჯის გაუქმების გადაწყვეტილება,"- წერს პრეზიდენტი.

 

 

მისივე თქმით, ედუარდ შევარდნაძის სახელი დარჩება მსოფლიოს და საქართველოს ისტორიაში. ედუარდ შევარდნაძე გაიხსენა და წერილი გაავრცელა პრემიერმინისტრმა გიორგი კვირიკაშვილმაც.

 

25 იანვარს ედუარდ შევარდნაძეს 90 წელი შეუსრულდებოდა. შევარდნაძე 1985-1990 წლებში საბჭოთა კავშირის საგარეო საქმეთა მინისტრი, 1995-2003 წლებში საქართველოს პრეზიდენტი იყო. 

 

„ვარდების რევოლუციის“ შემდეგ, 2003 წლის ნოემბერში, შევარდნაძე თანამდებობიდან გადადგა და პოლიტიკას ჩამოსცილდა. სიცოცხლის ბოლო წლები კრწანისის რეზიდენციაში გაატარა. ავტორია ავტობიოგრაფიული წიგნისა „ჩემი არჩევანი“, სადაც მისი პოლიტიკური კარიერა, გაუხმაურებელი ფაქტები და მოვლენებია აღწერილი.