გენერალ სამსონ ქუთათელაძის მკვლელობის საქმეზე, მტკვარზე საგამოძიებო მოქმედებები დღეს განახლდება. მაშველები, აკვალანგისტები და სამართალდამცველები სამძებრო სამუშაოებს მტკვრის მარჯვენა სანაპიროზე გუშინ, რამდენიმე საათის განმავლობაში აწარმოებდნენ. თუმცა მოგვიანებით, სამუშაოები ხილვადობის გაუარესებისა და დაბალი ტემპერატურის გამო შეწყდა.
„ინტერპრესნიუსს" შინაგან საქმეთა სამინისტროში დაუდასტურეს, რომ სამძებრო სამუშაოები სამსონ ქუთათელაძის საქმის ფარგლებში ჩატარდა, თუმცა, უწყებაში არ დააკონკრეტეს, რას ეძებდნენ სამართალდამცველები მდინარეში.
ეროვნული გვარდიის ყოფილი სარდალი და ყოფილი პარლამენტარი სამსონ ქუთათელაძე რამდენიმე დღის წინ რუსთავში, ე.წ. სტამბოლის ბაზარში, საკუთარ სამუშაო კაბინეტში მოკლეს. მას 6 ტყვია აქვს მოხვედრილი.