ენგურის ხიდთან ოთხთვალა ურმების მფლობელები გაიფიცნენ. აქციის მონაწილეების განცხადებით, აღნიშნულ ტერიტორიაზე არალეგალურად სამი მიკროავტობუსი მოძრაობს და მათ მუშაობის საშუალება არ ეძლევათ.
“მგზავრები აღარ გვყავს და ოჯახები ულუკმაპუროდ გვრჩება. მხოლოდ ეს სამი მიკროავტობუსი ახერხებს მუშაობას, რომლებსაც გარკვეული პირები მფარველობენ“, – აცხადებენ ისინი
ადგილზე მობილიზებულია პოლიცია. მცირე ხნის წინათ აქციის მონაწილეებმა ენგური-ზუგდიდის დამაკავშირებელი გზის გადაკეტვა სცადეს, მაგრამ მათ ამის საშუალება სამართალდამცავებმა არ მისცეს. დაკავებულია ოთხთვალა ურმის ერთ-ერთი მფლობელი სოფო მიქაია.
ადგილზე მყოფი სამართალდამცავების ინფორმაციით, ის ადმინისტრაციული წესით არის დაკავებული.
აქციის მონაწილეები არ იშლებიან. მათი განცხადებით, იმ შემთხვევაში, თუ ეს პრობლემა დროულად არ მოგვარდება, პროტესტის უკიდურეს ფორმას მიმართავენ.