ქარიშხალი ჩადგა, მაგრამ სინოპტიკოსები ხვალიდან რამდენიმე დღის განმავლობაში საქართველოში ისევ არამდგრად ამინდს პროგნოზირებენ.

 

გარემოს ეროვნული სააგენტოს ცნობით, ხვალ აღმოსავლეთ საქართველოს ცალკეულ რაიონში ღამისა და დილის საათებში მცირე ნალექი, უმეტესად თოვლის სახით და ნისლია მოსალოდნელი. დედაქალაქში მცირე თოვლჭყაპსაც ელოდებიან. ჰაერის ტემპერატურა ბარში +2, +7 გრადუსამდე დაიკლებს. დასავლეთ საქართველოში კი უნალექო ამინდია მოსალოდნელი, ზემო იმერეთსა და კოლხეთის დაბლობზე იქროლებს აღმოსავლეთის მიმართულების ძლიერი ქარი. ჰაერის ტემპერატურა დაბლობში +10, +15 გრადუსამდე მოიმატებს.

 

12 იანვარს დასავლეთ საქართველოს უმეტეს და აღმოსავლეთ საქართველოს ზოგიერთ რაიონში კვლავ ნალექიანი ამინდია მოსალოდნელი. ნალექიანი ამინდი მომდევნო ორი დღის განმავლობაშიც შენარჩუნდება. 14 იანვარს კი აღმოსავლეთ საქართველოში მოსალოდნელია თოვლი.