პანკისის ხეობაში დაჭრილი თემირლან მაჩალიკაშვილის მისაღებად მზადყოფნა ამ დროისათვის თურქეთის ორმა კლინიკამ გამოთქვა.
წმინდა მიქაელ მთავარანგელოზის სახელობის მრავალპროფილიანი კლინიკური საავადმყოფოს კლინიკურმა მენეჯერმა ზაზა ლურსმანაშვილმა, რომ ამ ორი კლინიკიდან ერთი საქართველოს ჯანდაცვის სამინისტრომ მოიძია, ხოლო მეორე – მაჩალიკაშვილების ოჯახმა.
გადაწყვეტილება თუ ამ ორიდან რომელ კლინიკაში მოხდება თემირლან მაჩალიკაშვილის გადაყვანა, ოჯახმა უნდა მიიღოს.
რაც შეეხება კონკრეტულად ჯანდაცვის სამინისტროს მიერ თურქეთში მოძიებულ კლინიკას, ექიმის თქმით, ამ კლინიკაში პაციენტის მიღებისთვის ადგილის პრობლემა არ არის. მისივე განმარტებით, თუ ოჯახი ამ კლინიკაში გადაყვანის თაობაზე თანხმობას განაცხადებს, ამის შემდეგ უკვე პაციენტის გადასაყვანად მზადყოფნა დაიწყება და არ არის გამორიცხული, რომ თემირლან მაჩალიკაშვილი თურქეთში ხვალვე გადაიყვანონ.
„ჯანდაცვის სამინისტროსგან ცოტა ხნის წინ მივიღეთ ოფიციალური ინფორმაცია, რომ თურქეთის ერთ-ერთმა კლინიკამ გამოხატა მზადყოფნა იმისთვის, რომ მოხდეს ჩვენი პაციენტის ტრანსპორტირება და იქ გაგრძელდეს მკურნალობა. ეს ინფორმაცია ჩვენ შემდეგ გავაცანით ოჯახის წევრებს და ველოდებით მათი მხრიდან დასტურს. თურქულ კლინიკას ადგილის პრობლემა არ აქვს და მზად არის, რომ უახლოეს პერიოდში მიიღოს პაციენტი“, – განაცხადა ექიმმა.
მისივე განმარტებით თემირლან მაჩალიკაშვილის ჯანმრთელობის მდგომარეობა უცვლელია და კვლავ მძიმედ რჩება.