აბაშის მუნიციპალიტეტის სოფელ კეთილარში დაკარგული 28 წლის ირაკლი კეკელიას ნათესავები პოლიციას უმოქმედობაში ადანაშაულებენ და აცხადებენ, რომ უწყებამ სამძებრო სამუშაოები გვიან დაიწყო. მათივე თქმით, უკვე მეექვსე დღეა, 28 წლის ბიჭი შინ არ დაბრუნებულა.
,,31 დეკემბერს გავიდა სახლიდან. ცხენით იყო, თხები გადენა და არ დაბრუნებულა. არავისთან მტრობა და შუღლი არ ჰქონდა, არც ნასვამი იყო. ცხენი გამოჩნდა, ჩემი შვილი არა. პოლიცია ყურადღებას არ გვაქცევს. ვითხოვთ დახმარებას", – აცხადებს დაკარგულის დედა თამილა კეკელია.
შინაგან საქმეთა სამინისტროს ინფორმაციით, აბაშის მუნიციპალიტეტის სოფელ კეთილარში დაკარგული 28 წლის ირაკლი კეკელიასთან დაკავშირებით ინტენსიური სამძებრო სამუშაოები მიმდინარეობს. გამოძიება დაწყებულია 143-ე მუხლით, რაც თავისუფლების უკანონო აღკვეთას გულისხმობს.