საქართველოს ყოფილი პრეზიდენტის მიხეილ სააკაშვილის სასამართლო პროცესი თბილისში ხვალისთვის არის ჩანიშნული.
მიხეილ სააკაშვილის სახაზინო ადვოკატი სოფიო გოგლიჩიძე საქმის მასალებს გაეცნო, თუმცა, ჯერჯერობით არ აკონკრეტებს, მოითხოვს თუ არა პროცესის გადადებას ხვალაც.
როგორც ცნობილია, სანდრო გირგვლიანის საქმეზე მიხეილ სააკაშვილის სასამართლო პროცესი უკვე ორჯერ იმ მიზეზით გადაიდო, რომ ადვოკატმა საქმის მასალების გაცნობის მიზნით დრო ითხოვა. 25 დეკემბრის სხდომაზე პროცესს "ნაციონალური მოძრაობის" ლიდერები და მხარდამჭერები ესწრებოდნენ. მათ პროცესის დასრულების შემდეგ საქმის პროკურორები შეძახილებით გააცილეს. სასამართლოში შეკრებილმა მხარდამჭერებმა პროკურორებს მონები უწოდეს.
აღსანიშნავია, რომ პროკურორმა სააკაშვილის ადვოკატი სხდომის გადადების მოთხოვნის დაყენების გამო სიცრუესა და პროცესის გაჭიანურების მცდელობაში დაადანაშაულა, თუმცა მოსამართლე გიორგი არევაძემ დააკმაყოფილა ადვოკატის, შუამდგომლობა სხდომის გადადებასთან დაკავშირებით.
ადვოკატი წინა პროცესზე აცხადებდა, რომ თუ 3 იანვრისთვის არ ექნება მომზადებული დასკვნითი სიტყვა, შესაძლოა გონივრული ვადა კვლავ მოითხოვოს.
პროკურორი ირაკლი ნადარეიშვილი კი ხვალინდელ პროცესზე სოფიო გოგლიჩის დისციპლინური პასუხისმგებლობის საკითხის დაყენებას აპირებს, თუკი ის ”პროცესის გადადებას კვლავ არარეალური მიზეზით მოითხოვს“.