საკონსტიტუციო სასამართლომ თითქმის ერთწლიანი ფიქრის შემდეგ "რუსთავი 2"-ის საქმეზე გადაწყვეტილება მიიღო. პლენუმმა სამაუწყებლო კომპანიის სარჩელი არ დააკმაყოფილა. ე.წ. ამორალური გარიგების საქმის განხილვა ორ წელზე მეტია მიმდინარეობდა.

 

ტელეკომპანია "საქართველო" სამოქალაქო კოდექსის იმ მუხლის არაკონსტიტუციურად ცნობას ითხოვდა, რომელიც ფასის არაპროპორციულობის გამო, ხელშეკრულების ბათილობის შესაძლებლობას ქმნის. როგორც „რუსთავი 2“-ის იურისტი განმარტავს,ამ  მუხლის ბათილობა არხს უზენაესი სასამართლოს მიერ გადაწყვეტილების გამოტანამდე სჭირდებოდა.

 

გადაწყვეტილება უარის სესახებ საკონსტიტუციო სასამართლოს პლენუმმა მხოლოდ 5 ხმით მიიღო. გადაწყვეტილებას მხარი გიორგი კვერენჩხილაძემ, ირინა იმერლიშვილმა, მაია კოპალეიშვილმა და თამაზ ცაბუტაშვილმა არ დაუჭირეს.საკონსტიტუციო სასამართლოს თავმჯდომარის ზაზა თავაძის .განცხადებით, აღნიშნული მოსამართლეთა განსხვავებული მოსაზრებები გადაწყვეტილებას დაერთვება.

 

საკონსტიტუციო სასამართლოს მთავარი მრჩეველი  სალომე ჯოხაძე საკონსტიტუციო სასამართლოს გადაწყვეტილებას ხსნის იმით, რომ  მოსარჩელე მხარის არგუმენტაცია იყო ბუნდოვანი.

 

„საკონსტიტუციო სასამართლომ აღნიშნა, რომ გასაჩივრებული ნორმა წარმოადგენს გარიგების ბათილობის უზოგადეს საფუძველს, რომლის მიზანიც არის მოწესრიგების გარეშე არ დატოვოს ისეთი შემთხვევები, რომლებიც გამომდინარეობს სახელშეკრულებო სამართლის ფუნდამენტური პრინციპებიდან, თუმცა არ არის გათვალისწინებული გარიგების სხვა საფუძვლებში,“ – განაცხადა მან.