შეკვეთილში, საქართველოს ყოფილი პრემიერ-მინისტრის ბიძინა ივანიშვილის დენდროლოგიურ პარკში ზუგდიდიდან ასწლოვანი მუხის გადატანა ანაკლიის ზღვიდან იგეგმება. კომპანია „ზიმოს“ წარმომადგენლები ანაკლიაში უკვე რამდენიმე დღეა სანაპიროდან ბარჟის გასაყვანად სამუშაოებს აწარმოებენ.
ადგილზე რამდენიმე ერთეული სპეც ტექნიკა მუშაობს.კომპანია ზიმოს წარმომადგენლებმა თავიდან განაცხადეს, რომ სამუშაოები ნაპირის გასამაგრებლად მიმდინარეობს, თუმცა საბოლოოდ არც უარყვეს, რომ აქედან ხის გადატანა მოხდება.
ინგირში, ჭეჟიების ოჯახში საუკუნოვანი მუხის გარშემო ფუნდამენტის ამოღება ოქტომბერში დაიწყეს. უკვე ცნობილია, რომ ყოფილი პრემიერი გიგანტური ხის წაღებას დენდროლოგიურ პარკამდე საზღვაო ბარჟით აპირებს. რა პერიოდში მოხდება ხის გადატანა, ჯერჯერობით უცნობია. ამაზე არც ის კომპანია საუბრობს, რომელიც ამჯერად სამუშაოებს ასრულებს.
კომპანია „ზიმო“ ერთადერთია, რომელიც ივანიშვილის ხეებისთვის ზღვიდან ბარჟის გადასატან სამუშაოებს მთელ საქართველოში აწარმოებს.ადგილობრივები ზღვის სანაპიროზე მიმდინარე სამუშაოებს აპროტესტებენ და ამბობენ, რომ ნადგურდება ინფრასტრუქტურა და ეკოლოგიური ზიანის საშიშროებაც არსებობს. ანაკლიელების განმარტებით, ზღვიდან ხის გატანის უფლებას ყოფილ პრემიერ-მინისტრს არ მისცემენ.