წუხელ გვიან ღამით ზუგდიდის სოფელ ყულიშკარში საცხოვრებელი სახლი დაიწვა.
სახლი მაქაცარიების ათსულიან ოჯახს ეკუთვნის, საბედნიეროდ, მათგან არავინ დაშავებულა.
ცეცხლი, სავარაუდოდ, მოკლე ჩართვამ გამოიწვია და ისე სწრაფად მოედო სახლს, რომ ვერაფრის გადარჩენა ვერ მოხერხდა და ოჯახი ახლა თავს აფარებს იქვე, ეზოში მდგარ დამხმარე ნაგებობას, რომელიც სახანძრო -მაშველი ბრიგადისა და მეზობლების ძალისხმევით ცეცხლს გადაურჩა, მაგრამ საცხოვრებლად, მით უფრო მრავალრიცხოვანი ოჯახისთვის, უვარგისია.
გვიანი ღამის გამო, სოფელმა ცეცხლი მაშინღა შეამჩნია, როცა მთელ სახლს იყო მოდებული და სანამ სახანძროს გამოიძახებდნენ, მთლიანად დაიწვა. სახანძრომ ისღა შეძლო, რომ ცეცხლი სხვა დამხმარე ნაგეობებზე არ გადასულიყო.
დაზარალებული ოჯახი აცხადებს, რომ ხანძრის შედეგად განცდილი ზარალი დაახლოებით, 70 000-მდე ლარს შეადგენს და არავითარი სხვა რესურსი და იმედი გარდა სახელმწიფო დახმარებისა არ გააჩნია.
სოფლის ადმინისტრაციაში აცხადებენ, რომ ოჯახი შესაბამისი პროგრამით გათვალისწინებულ 1000 ლარიან დახმარებას და სამშენებლო მერქანს მიიღებს.