ჟენევაში საერთაშორისო დისკუსიის 42-ე რაუნდი მნიშვნელოვანი შედეგების გარეშე დასრულდა, – ამის შესახებ საქართველოს საგარეო საქმეთა მინისტრის მოადგილემ, დავით დონდუამ განაცხადა. მისივე თქმით, ძალის გამოუყენებლობის თემაზე შეხვედრის მონაწილეებს განსხვავებული მიდგომები აქვთ, რის გამოც მოლაპარაკებებში წინსვლა არ იყო.„ამ რაუნდზე საკმაოდ აქტიურად ვისაუბრეთ მონაწილეთა ერთობლივ განცხადებაზე, რომელზეც უკვე დიდი ხანია, ხუთი წელია მიმდინარეობს მუშაობა. საუბარია ძალის არგამოყენებაზე და ადგილზე უსაფრთხო საერთაშორისო მექანიზმების შექმნაზე, თუმცა ჯერ კიდევ რჩება განსხვავებები მიდგომებში მონაწილეების მხრიდან, ამიტომ ვერ ვიტყვი, რომ რაიმე პროგრესს ჰქონდა ადგილი“, – განაცხადა დავით დონდუამ.ჟენევის დისკუსიების 42-ე რაუნდი 12 და 13 დეკემბერს ჩატარდა. პირველ შეხვედრას ქართული მხარე პოზიტიურად აფასებდა.