მე მჯერა მიშას ადამიანურობის და სიმართლის, – ამის შესახებ „ინტერპრესნიუსს“ საქართველოს ყოფილმა პირველმა ლედიმ, სანდრა რულოვსმა განუცხადა.
რულოვსმა იმედი გამოთქვა, რომ უკრაინის ხელისუფლება გონს მოვა.
”რა თქმა უნდა ცდილობენ, რომ გააჩერონ მიშა, მაგრამ მე მგონი, ისეთი პროცესები აქვს მას უკრაინაში დაწყებული, რომ ამის უკანა გზა არც არსებობს.
როგორც ვიცი, დღეს რეგიონებიდან უერთდება ხალხი. მიშა რომც დაიჭირონ და ცოტა ხანი მაინც აქტიური არ იყოს, ეს პროცესი მაინც გაგრძელდება. მე ასე მჯერა, მაგრამ მიშას აქვს გამოცდილება და ყველაზე დიდი მონდომება, რომ უკრაინას დაეხმაროს კორუფციის დამარცხებაში, როგორც საქართველოს დაეხმარა, რომ მეტი პონტენციალი ეჩვენებინა მსოფლიოსთვის. ამის გეგმები აქვს. უკრაინის განვითარება უფრო სწრაფი ტემპებით შეიძლება, რადგან უფრო დიდი ქვეყანაა, ხალხი ძალიან ბევრია, ბევრი შეძლებული ხალხიც არის ვინ შეიძლება მხარში დაუდგეს. მე დიდი იმედით ვარ, რომ უკრაინის მთავრობა მოვა გონს. ჩანს ამერიკის და ევროპის მხარდაჭერა მიშას ფიზიკური უსაფრთხოების საკითხზე და გამჭვირვალე პროცესებზე. მე ვფიქრობ, გვაქვს დღეს შანსი, რომ მშვიდობიანი დღე იყოს და მუქარები მუქარად დარჩეს”, – განაცხადა სანდრა რულოვსმა და დასძინა, რომ მას მიხეილ სააკაშვილის სიმართლის და ადამიანურობის სჯერა.
”მისი ბრძოლის, მისი ადამიანურობის და სიმართლის მე მჯერა. მე როგორც ვიცი, ახლა არის თავის მომხრეებთან ერთად. იმ ბანაკში, სადაც ადრე იყო. მხარდამჭერების ბანაკში, რომელიც რადასთან ახლოს არის. ცივი ამინდია და ვნახოთ, როგორ გადაიტანა ღამე”, – განაცხადა სანდრა რულოვსმა.
ყოფილი პირველი ლედი უკრაინაში მეუღლის, მიხეილ სააკაშვილის მხარდასაჭერად გაემგზავრა.