ამერიკის შეერთებული შტატებისთვის უკრაინა, ისევე როგორც საქართველო, არის პარტნიორი და იმედი გვაქვს, რომ იქ კანონის უზენაესობა დაცული იქნება, – განაცხადა აშშ-ის ელჩმა საქართველოში იან კელიმ ექსპრეზიდენტ მიხეილ სააკაშვილის იმ განცხადების კომენტირებისას, რომლის თანახმად უკრაინის პრეზიდენტმა მისი დაპატიმრების ბრძანება გასცა.
იან კელის თქმით, მას არ უნახავს მიხეილ სააკაშვილის აღნიშნული განცხადება.
„მე არ მინახავს ეს ინფორმაცია. აშშ-ისთვის უკრაინა, ისევე როგორც საქართველო, არის პარტნიორი და დიდი ინვესტიცია აქვს ჩადებული უკრაინის დემოკრატიის გაძლიერებაში და მე ვიტყვი მხოლოდ იმას, რომ მე მაქვს დიდი რწმენა ჩვენს პარტნიორებში და იმაში, რომ უკრაინაში პატივს სცემენ კანონის უზენაესობასა და ადამიანის უფლებებს…" – განაცხადა იან კელიმ.
საქართველოს ყოფილი პრეზიდენტი აცხადებს, რომ უკრაინის პრეზიდენტმა პეტრო პოროშენკომ სახელმწიფო გადატრიალების მცდელობისთვის მისი დაპატიმრების ბრძანება გასცა.
„ჩემთვის გახდა ცნობილი, რომ პეტრო პოროშენკომ საბოლოოდ გადაკვეთა წითელი ხაზი და გასცა ბრძანება ჩემი დაპატიმრების შესახებ უკრაინაში სახელმწიფო გადატრიალების მცდელობისა და ოდესაში რაღაც გამოგონილი საქმის გამო“, – აღნიშნა სააკაშვილმა.