დღეს პარლამენტში კენჭს უყრიან ახალი სახალხო დამცველის კანდიდატებს, მათ შორის საპარლამენტო უმრავლესობის მიერ დასახელებულ ნინო ლომჯარიას, რომელიც კანონმდებლების წინაშე პლენარულ სხდომაზე გუშინ წარდგა.
„ქართული ოცნების“ რიგებში ამ საკითხზე ერთიანი პოზიცია არ არის, ლომჯარიას კანდიდატურას თავად წარმდგენი უმრავლესობის ნაწილი ეწინააღმდეგება, თუმცა ვარაუდობენ, რომ საბოლოოდ უმრავლესობის მხარდაჭერა მაინც მას ექნება.
ნინო ლომჯარიას კანდიდატურა მიუღებელი არ არის ნაციონალური მოძრაობისთვის, თუმცა მათ, ისევე როგორც საპარლამენტო უმცირესობის დანარჩენ ნაწილს, პრეტენზიები სახალხო დამცველობის კანდიდატის შერჩევის პროცესთან დაკავშირებით აქვთ.
„სამწუხაროდ მმართველმა გუნდმა, საპარლამენტო უმრავლესობამ პროცესი წარმართა კულუარულად. მათ თავად გამოარჩიეს ფავორიტი კანდიდატი და წარმოგვიდგინეს იგი დასამტკიცებლად. ჩვენ ვთვლით, რომ ეს არ არის სწორი ფორმა,“-აცხადებს „ევროპული საქართველოს" წევრი ოთარ კახიძე.
ამდენად საპარლამენტო იმცირესობა კენჭისყრაში დღეს მონაწილეობას საერთოდ არ მიიღებს.
ოპოზიციის ამ განცხადებებს უპასუხა სახალხო დამცველობის კანდიდატმა.
„სახალხო დამცველის კანდიდატურა შეირჩა შიდა დისკუსიების და განხილვის შედეგად, ვინაიდან მუსირებდა აზრი, რომ თითქოს ეს იყო მიღებული გადაწყვეტილება, მე ვფიქრობ დღევანდელმა პროცესმაც და საკომიტეტო განხილვებმაც აჩვენა, რომ ამ თვალსაზრისით მიმდინარეობს დისკუსია უმრავლესობაში,“-განაცხადა ნინო ლომჯარიამ.