მუნიციპალიტეტები ინფრასტრუქტურულ პროექტებს კიდევ სამი წელი ვერ განახორციელებენ – მათ ეს შეზღუდვა „ადგილობრივი თვითმმართველობების“ კოდექსით 2018 წლის 1 იანვრამდე უნდა ჰქონოდათ, თუმცა პარლამენტში წარდგენილი შესაბამისი კანონპროექტით, ეს ვადა 2021 წლის 1 იანვრამდე გადაიწევს.
კერძოდ, რეგიონებში, აუცილებელ ინფრასტრუქტურულ პროექტებს, მუნიციპალიტეტის ინიციატივით და მთავრობის დავალებით, ისევ ცენტრალური ხელისუფლება, კერძოდ კი ინფრასტრუქტურის სამინისტრო განახორციელებს.
კანონპროექტის განმარტებით ბარათში ნათქვამია, რომ ამ ეტაპზე მუნიციპალიტეტების რესურსებისა და ბიუჯეტის გათვალისწინებით, საკმაოდ რთულია მუნიციპალიტეტმა დამოუკიდებლად, საკუთარი ძალებითა და სახსრებით განახორციელოს ყველა ის ინფრასტრუქტურული პროექტი, რომელიც აუცილებელია ადგილობრივი მოსახლეობის ყოფითი პირობების გაუმჯობესებისთვის. ასევე, ტურიზმის განვითრებისა და მუნიციპალიტეტის შესაბამისი ორგანოების შეუფერხებელი ფუნქციონირებისათვის.