27 ნოემბერი საქართველოს პრემიერ-მინისტრ გიორგი კვირიკაშვილისა და მთავრობის გადაწყვეტილებით, ქვეყანაში გლოვის დღედ გამოცხადდა.
ბათუმში, სასტუმრო „ლეოგრანდში“ მომხდარი ტრაგედიის გამო გარდაცვლილთა ხსოვნის პატივსაცემად, სახელმწიფო უწყებების შენობებზე დროშები დაეშვა. დროშები დაშვებულია საქართველოს მთავრობის ადმინისტრაციის, პრეზიდენტის სასახლის, პარლამენტის თბილისისა და ქუთაისის შენობებზე, შსს-ს ყველა შენობაზე, თბილისის საკრებულოს, ასევე სხვა სახელმწიფო უწყებებზე.
"ლეოგრანდის" შენობასთან ხალხის ნაკადი არ წყდება. ბათუმელებს და ჩასულ სტუმრებს სასტუმროსთან სანთლები და ყვავილები მიაქვთ და დაღუპულების ხსოვნას პატივს მიაგებენ. ყვავილები ხელისუფლების წარმომადგენლებმაც მიიტანეს. აჭარის ავტონომიური რესპუბლიკის მთავრობის თავმჯდომარემ ზურაბ პატარიძემ განაცხადა, რომ ეს არის დიდი ტრაგედია.
„ჩვენ დღეს აქ შევიკრიბეთ იმისთვის, რომ პატივი მივაგოთ ჩვენს ახალგაზრდა ბიჭებს, რომელთა სიცოცხლე შეეწირა ამ ძალიან დიდ ტრაგედიას. მინდა მივუსამძიმრო ოჯახის წევრებს, ნათესავებს, ახლობლებს, ქალაქელებს. მთელი ქვეყანა გლოვობს. ეს არის ძალიან დიდი ტკივილი თითოეული ჩვენგანისთვის,“ – განაცხადა მან.
აჭარის მთავრობის მეთაურის თქმით,დაზარალებულ ოჯახებს ფინანსური დახმარება გაეწევა.
ბათუმის მერმა ლაშა კომახიძემ კომენტარი უსაფრთხოების თვალსაზრისით ნორმების გამკაცრებაზეც გააკეთა.
„ყველა განაცხადი, ეს იქნება საპროექტო განაცხადი თუ ნებართვა მშენებლობაზე უკვე ითვალისწინებს, რომ ეს ნორმები შემოწმებული იყოს მაქსიმალურად მკაცრად და ახლა ასეც მიმდინარეობს. რაც შეეხება კიდევ უფრო გამკაცრებას, თუკი ამის საჭიროება იქნება, მთავრობა განიხილავს,“ – აცხადებს ბათუმის მერი