ჟურნალისტი ლაშა ბერულავა მკითხველის ყურადღებას ამახვილებს ერთ მნიშვნელოვან დეტალზე:
გუშინდელი სპეცოპერაციის მიმდინარეობისას ერთადერთი, ვინც კომენტარი გააკეთა საერთაშორისო დიპკორპუსიდან, აშშ-ის ელჩი იყო.
იან კელიმ ორ რამეს გაუსვა ხაზი:
ა) უზრუნველყავით მოსახლეობის უსაფრთხოება;
ბ) სპეცოპერაციის დამთავრების შემდეგ მოსახლეობას გამჭვირვალედ მიაწოდეთ ინფორმაცია.
სავარაუდოდ, კელიმ კარგად იცოდა, რომ ხელისუფლება სპეცოპერაციის დეტალების გასაჯაროებას (რა თქმა უნდა, დასაშვებ ფარგლებში, მინიმუმ, ლიკვიდირებულთა ვინაობის გამხელით მაინც) არ აპირებდა.
დღეს შს მინისტრმა თქვა, რომ საქმე გვაქვს საერთაშორისო ტერორიზმის ფაქტთან, რომ გამოძიება სხვა ქვეყნებშიც მიმდინარეობს, რომ ლიკვიდირებული ჩატაევია თუ არა, უნდა დაველოდოთ ექსპერტიზას, ხოლო შეკითხვაზე, იყო თუ არა ეს ტერორიზმი, განაცხადა, რომ ეს იყო მცდელობა, ხოლო კვალიფიკაცია სუს-ს გადაულოცა.
ტერორიზმთან ბრძოლაში ყველაზე დიდი გამოცდილების მქონე სახელმწიფოს დიპლომატის რჩევას ხელისუფლება არ/ვერ ითვალისწინებს, რითაც კვებავს ჭორებს.'' წერს ლაშა ბერულავა.