„მადლობა გორში და ქუთაისში მოსულ მაყურებელს! დიდი მადლობა ვინც ამ ორი თამაშის განმავლობაში მხარი დაუჭირა ჩვენს ნაკრებს! მე, სანამ ერთი გულშემატკივარი მაინც მეყოლება ჩვენს ქვეყანაში, იმ ადამიანისთვის გამოვცხადდები ნაკრებში! შევხვდებით 2018-ში”,- დაწერა გურამ კაშიამ თავის ფეისბუქ გვერდზე გორსა და ქუთაისში გამართული საფეხბურთო მატჩების შემდეგ.
ფაქტობრივად ეს არის საქართველოს ეროვნული ნაკრების ვიცე-კაპიტანი და არნემის „ვიტესის“ კაპიტნის პასუხი მის წინააღმდეგ „ქართული მარშის“ წევრების მიერ აგორებული კამპანიაზე, რომლის ნაწილია მათი მორიგი გამოხდომა გუშინ ქუთაისის სტადიონზე.
„ქართული მარშის“ წევრები სტადიონზე შეიჭრნენ და გურამ კაშიას მისამართით შეურაცხმყოფელ ტექსტებს სკანდირებდნენ იმის გამო, რომ იგი ჰოლანდიის ჩემპიონატში არნემული კლუბის ერთ-ერთ მატჩზე „ფობიის საწინააღმდეგო კამპანიის“ სიმბოლიკით გამოვიდა და მხარდაჭერა გამოუცხადა ლგბტ თემს, რომელიც გარკვეულ ჯგუფებში განსხვავებულთა მიმღებლობის დეფიციტისა და ღია აგრესიის მსხვერპლია.
