თვითმმართველი ქალაქის, ქუთაისის და თვითმმართველი თემების – ყაზბეგის, ხაშურის, ბორჯომის, ოზურგეთისა და მარტვილის მერების არჩევნების მეორე ტური მიმდინარეობს.
ცენტრალურ საარჩევნო კომისიაში მეორე ტურთან დაკავშირებით პირველი საინფორმაციო ბრიფინგი გაიმართა. როგორც ცესკოს სპიკერმა განაცხადა, 317-ვე საარჩევნო უბანი ამომრჩევლისთვის 08:00 საათზე გაიხსნა.
„ხმის მიცემის პროცესი მშვიდ და ყველასათვის ხელმისაწვდომ გარემოში მიმდინარეობს. 12 ნოემბრის არჩევნებში 6 საარჩევნო სუბიექტის მიერ წარდგენილი კანდიდატები მონაწილეობენ, მათგან 2 საინიციატივო ჯგუფის მიერ წარდგენილი კანდიდატია. ამომრჩევლებს საარჩევნო უბანზე გადაეცემათ მხოლოდ ერთი საარჩევნო ბიულეტენი მერის ასარჩევად“ – აღნიშნა ანა მიქელაძემ.
ანა მიქელაძის თქმით, რეგისტრირებული ამომრჩევლების რაოდენობა ექვსივე მაჟორიტარულ ოლქში ჯამში არის – 328 272 ამომრჩეველი.
შეგახსენებთ, ენმ-ის კანდიდატებმა გრიგოლ ვაშაძემ ( ქუტაისში) და მამუკა დანელიამ ( მარტვიში) უარი განაცხადეს მეორე ტურში მონაწილეობაზე არჩევნების პირველ ტურში ხელისფლების ქმედებებისადმი პროტესტის ნიშნად, თუმცა მათი გვარები ბიულეტენებზე მაინც არის აღნიშნული
12 ნოემბრის არჩევნებზე მონაწილე საარჩევნო სუბიექტების მიერ რეგისტრირებულია დაკვირვების უფლების მქონე 2 143 წარმომადგენელი, ადგილობრივი არასამთავრობო ორგანიზაციის 18 149 და საერთაშორისო სადამკვირვებლო ორგანიზაციის 654 დამკვირვებელი, ხოლო მედია ორგანიზაციის 4 688 წარმომადგენელი.