ჩხოროწყუს მუნიციპალიტეტში "ჩხოროწყობა 2017" აღინიშნა. დღესასწაული „საპატიო ჩხოროწყუელის“ დაჯილდოების ცერემონიით გაიხსნა. საპატიო ტიტული მუნიციპალიტეტის განვითარებისთვის შეტანილი განსაკუთრებული წვლილისთვის 8 ჩხოროწყუელს მიენიჭა.
დღესასწაულთან დაკავშირებით, დილიდან სხვადასხვა კულტურული, სპორტული და გასართობი ღონისძიებები ჩატარდა. მუნიციპალიტეტის ცენტრში ეთნოკუთხეები, ხალხური რეწვის ნიმუშები, მეგრული ფაცხები, სამზარეულო, ხელნაკეთი ნივთები და სხვადასხვა ნამუშევრები იყო გამოფენილი. სტუმრებს დღის ბოლომდე შეეძლოთ ტრადიციული კერძების დაგემოვნება და გამოფენების დათვალიერება.
ღონისძიების პროგრამის ფარგლებში, ცენტრში მოწყობილ სცენაზე ადგილობრივი ანსამბლებისა და ინდივიდუალური შემსრულებლების კონცერტი გაიმართა.
გუშინვე ჩხოროწყუში ახალი საბავშვო ბაღი გაიხსნა, სოფელ ხაბუმეში ბაღის მშენებლობისთვის 195 ათასი ლარი დაიხარჯა. სკოლამდელი სააღმზრდელო დაწესებულება ევროპული სტანდარტების შესაბამისია და გათვლილია 50 აღსაზრდელზე. საბავშვო ბაღთან ერთად კეთილმოეწყო ეზო და სათამაშო სივრცე.
