პრეზიდენტი გიორგი მარგველაშვილი გმობს ნიუ-იორკში მომხდარ ტერაქტს და ამერიკელ ხალხს თანადგომას უცხადებს.
„უკიდურესად აღშფოთებული ვარ ნიუ-იორკში მომხდარი ტერორისტული თავდასხმის გამო, რომელსაც უდანაშაულო ადამიანების სიცოცხლე ემსხვერპლა. საქართველო გმობს ტერორიზმის ნებისმიერ გამოხატულებას და დგას საერთაშორისო საზოგადოების გვერდით მსოფლიოს ამ უდიდესი საფრთხის წინააღმდეგ ბრძოლაში.ამ მძიმე წუთებში, ქართველი ხალხისა და პირადად ჩემი სახელით თანადგომას ვუცხადებ ამერიკის შეერთებული შტატების ხელისუფლებასა და ხალხს,“'' – ნათქვამია საქართველოს პრეზიდენტის განცხადებაში.
გუშინ საღამოს ნიუ-იორკში განხორციელებულ ტერაქტს 8 ადამიანის სიცოცხლე ემსხვერპლა. მანჰეტენზე ავტომობილი ჯერ ველოსიპედებისთვის განკუთვნილ ბილიკზე შევარდა, შემდეგ კი ფეხით მოსიარულეებს დაეჯახა. თავდასხმის შედეგად 6 ადამიანი ადგილზე დაიღუპა. მათ შორის ბელგიისა და არგენტინის მოქალაქეებიც არიან.
15 დაშავებული საავადმყოფოებშია გადაყვანილი, აქედან რამდენიმეს მდგომარეობა კრიტიკულია. სამართალდამცველებმა ტერორისტი ადგილზე დააკავეს.
ადგილობრივი მედიის ინფორმაციით, ის უზბეკეთის მოქალაქე, 29 წლის საი-ფულო საიპოვია, რომელიც შეერთებულ შტატებში 2010 წლიდან იმყოფება.
მის მანქანაში აღმოჩენილი წერილის მიხედვით, საიპოვი დაჯგუფება "ისლამური სახელმწიფოს" სახელით მოქმედებდა.
თვითმხილველთა ინფორმაციით, თავდასხმის დროს ის არაბულ ენაზე ალაჰის სადიდებელ სიტყვებს ყვიროდა. გამოძიება ტერორიზმის მუხლით მიმდინარეობს.