შავი არქეოლოგია და აღებ-მიცემობა ოკუპირებულ აფხაზეთში. ერმიტაჟში 2001 წელს სხვადასხვა კოლექციონერებისგან შეძენილი არტეფაქტები გამოფინეს

0
601
ოკუპირებული აფხაზეთის დეფაქტო საგარეო საქმეთა ყოფილმა მინისტრმა ვიაჩესლავ ჩიკირბამ იმ არტეფაქტების ფოტოები გამოაქვეყნა, რომლებიც მან ერმიტაჟში აღმოაჩინა. საინფორმაციო დაფებზე მითითებულია, რომ ექსპონატები ოკუპირებულ აფხაზეთში, ცანდრიფში ხაშუფსეს ციხე-სიმაგრეშია აღმოჩენილი. ინფორმაციას აფხაზეთის მედია ავრცელებს.  
 
ოკუპირებული რეგიონიდან გატანილ და ერმიტაჟში განთავსებულ არტეფაქტებს შორის არის ვერცხლის ლანგარი, რომელზეც გოლგოთაა გამოსახული. ის 518 წლით თარიღდება და მის უკანა მხარეს აღმოსავლეთ რომის იმპერატორის ანასტასიოს I-ის ბეჭედია დარტყმული. ასევე არის, ბიზანტიური ვერცხლის ორი კოვზი, მე-6 საუკუნის მონოგრამებით და I-II საუკუნის მინის ფიალა დასავლეთ რომის იმპერიიდან. 
 
დაფებზე მინაწერის მიხედვით, ყველა არტეფაქტი 2001 წელს სხვადასხვა კოლექციონერიდან შეიძინეს.
 
ე.წ. საგარეო საქმეთა ყოფილი მინისტრი დეფაქტო კულტურის უწყებას მიმართავს, რომ დაინტერესდეს ამ შემთხვევით და ერმიტაჟის მხრიდან უკანონოდ მოპოვებული არტეფაქტების შეძენაზე პოზიცია გამოხატოს. 
 
 
თავად ოკუპირებული რეგიონის წარმომადგენლებიც წერენ, რომ შავი არქეოლოგია რეგიონში გააქტიურებულია. ბოლო 12 წლის განმავლობაში, შავი არქეოლოგიით დაკავებულმა ადამიანებმა ოკუპირებულ აფხაზეთში 300-ზე მეტი სამარხი გათხარეს.
 
საქართველოს კულტურისა და ძეგლთა დაცვის სამინისტრო კი დუმს. 
 
წინა სტატია,,ზედმეტი” კითხვა: გიორგი კვირიკაშვილს ბაქო-თბილისი-ყარსის რკინიგზისოფიციალურ გახსნაზე პრეზიდენტი მიხეილ სააკაშვილი არც უხსენებია
შემდეგი სტატიასაქართველოში 3 ნოემბრამდე ცივი ამინდი შენარჩუნდება, მოსალონელია თოვლი
ტელეკომპანია ოდიშის საინფორმაციო სამსახური