კიევში, რადასთან, მიხეილ საკაშვილის მიერ რეფორმების მოედნად წოდებულ ტერიტორიაზე ხალხი იკრიბება. დღეს აქ ხალხმრავალი მიტინგია დაანონსებული.
მიტინგზე ხალხი მიხეილ სააკაშვილის თხოვნით ამჯერად პარტიული დროშების გარეშე, მხოლოდ სახელმწიფო დროშებით მიდის, რითაც ხაზი ესმება იმ ჯანსაღ ოპოზიციურ ძალთა ერთიანობას, რომელნიც ჭეშმარიტ რეფორმებს მოითხოვენ ქვეყნისთვის.
აქციაზე უკვე მივიდნენ სააკაშვილის თანამოაზრე დავით საყვარელიძე, ასევე რადას დეპუტატები ეგორ სობოლევი, იური დერევიანკო, სემიონ სემიონენკო და ქალაქ გლუხოვის მერი მიშელ ტერეშჩენკო. წუთი წუთზე მოელიან საქართველოს ყოფილ პრეზიდენტს, ოდესის ოლქის ყოფილ გუბერნატორს, პარტია „ახალი ძალების“ ლიდერს მიხეილ სააკაშვილს, რომელიც ამ დრისათვის კარვების ქალაქის მიმდებარე ტერიტორიაზე უკრაინული და უცხოური მედიის წარმომადგენელთა შეკითხვებს პასუხობს.
და აი, აქციაზე მიხეილ სააკაშვილი მივიდა.
ამ წუთებში იგი სიტყვით მიმართავს აქციის მონაწილეებს. იგი უკრაინის განვითარებისათვის გადაუდებელ ამოცანებზე და იმ უღირს მეთოდებზე საუბრობს, რომლითაც პეტრო პოროშენკოს რეჟიმი პოლიტიკურ ოპონენტებს ებრძვის.
ამ კონტექსტში შეეხო იგი გუშინ განვითარებულ მოვლენებსაც.
„პეტრო პოროშენკო იაფფასიანი „მაფიოზივით“ იქცევა, ის „ბოლო გაფრთხილებას“ მაძლევს. როდესაც მე ოდესაში ვმუშაობდი, მან მოქალაქეობა ჩამოართვა ალექსანდრე ბოროვიკს და ამით მაფრთხილებდა, რომ მეც იგივე მელის. მე არ დავნებდი და მან მოქალაქეობა ჩამომართვა. ახლა მე კიევში ვარ და იჭერენ ჩემი გარემოცვის ყოფილ წევრებს, სცემენ და საქართველოში თავზე ტომარაჩამოცმულებს აგზავნიან. პოროშენკო ისევ მაფრთხილებს, რომ მეც იგივე მელის. მაგრამ მე ამის არ მეშინია – დამაკავონ, მცემონ, მომკლან – უკრაინელ ხალხს ისინი ვერ შეაჩერებენ“, – აცხადებს სააკაშვილი.