„ნაციონალური მოძრაობის“ წევრის ზაზა ბიბილაშვილის განცხადებით არჩევნები მძიმე დარღვევების ფონზე მიმდინარეობს.
„ჩვენი პარტიის მიერ შეტანილია მხოლოდ თბილისში 100-ზე მეტი საჩივარი. საქართველოს მასშტაბით შეტანილია 200 საჩივარზე მეტი და საჩივრების რაოდენობა მატულობს ყოველწუთიერად,“-განაცხადა ზაზა ბიბილაშვილმა.
მისივე თქმით მთავარი დარღვევა ამ ეტაპისთვის არის ის, რომ „ქართული ოცნების“ დამკვირვებლები დგანან რეგისტრატორის მაგიდის უკან და აღრიცხავენ ამომრჩეველს.
მისივე თქმით უკვე ერთი საათია ამ ფაქტებზე მიმდინარეობს საუბარი, თუმცა ცესკო-ს არანაირი რეაგირება არ მოუხდენია ამიტომ „ნაციონალური მოძრაობა“ აპირებს მივიდეს ცენტრალურ საარჩევნო კომისიაში და მოითხოვონ პასუხი.
გარდა ამისა, კიდევ ერთი მთავარ პრობლემა, რომელიც გამოიკვეთა ეს არის მიწერების საკითხი, როდესაც ამა თუ იმ მისამართზე არიან ჩაწერილი ისეთი ადამიანები, რომელსაც მესაკუთრეები საერთოდ არ იცნობენ.
სხვა მოსაზრება აქვს "ქართული ოცნების"თბილისის მერობის კანდიდატის კახა კალაძის საარჩევნო შტაბის ხელმძღვანელს არჩილ თალაკვაძეს:
ჯერჯერობით დარღვევებთან დაკავშირებით ჩვენ არ გვაქვს განსაკუთრებულად საინტერესო მონაცემები – განაცხადა მან დღეს გამართულ ბრიფინგზე
"08:00 საათიდან პრაქტიკულად ყველა უბანი გახსნილია. ჩვენი მხარდამჭერები აქტიურობენ. პირველი შეხედვითაც ჩანს, რომ საარჩევნო ადმინისტრაციამ ყველაფერი გააკეთა იმისთვის, რათა საარჩევნო პროცესი კარგად ყოფილიყო ორგანიზებული. უკვე დღის განმავლობაში ჩვენ გვექნება განახლებული მონაცემები, რომელსაც საზოგადოებას გავუზიარებთ", – განაცხადა თალაკვაძემ.
"ჩვენს ინტერესებში არასდროს და არც ახლა არ შედის ამომრჩევლებზე ზეწოლა, რაიმე ტიპის მანიპულაცია ამომრჩევლის თავისუფალ ნებაზე, იმიტომ, რომ ჩვენ გვაქვს ყველაზე დიდი მხარდაჭერა, შესაბამისად, ჩვენი ერთადერთი მიზანია, რომ ეს მხარდაჭერა საარჩევნო უბნებზე დაფიქსირდეს", – განაცხადა თალაკვაძემ.