კიევში, უკრაინის რადასთან გრუშევსკის ქუჩაზე მომიტინგეებსა და პოლიციას შორის შეტაკების შედეგად, 11 ადამიანი დააკავეს. შეტაკება მას შემდეგ მოხდა, რაც პოლიციამ აქციის მონაწილეთაგან იმ ფარების დაბრუნება სცადა, რომელიც მათ 17 ოქტომბერს სამართალდამცველებს მოპარეს. ამის შესახებ „ლიგა“ ეროვნულ პოლიციაზე დაყრდნობით იუწყება.„როდესაც მომიტინგეთა კოლონა, იმ ადამიანების მეთაურობით, ვისაც ხელში პოლიციის ფარები ეკავა, სხვა ადმინისტრაციული შენობებისკენ მიემართებოდა, პოლიციამ მათ კიდევ ერთხელ მოუწოდა ფარები დაებრუნებინათ. უარის შემდეგ მოხდა შეხლა-შემოხლა, რომლის დროსაც სამართალდამცველებმა 11 ადამიანი დააკავეს“, – ნათქვამია პოლიციის განცხადებაში. მათი ინფორმაციით, სამი ადამიანი უკვე გაათავისუფლეს.