დღეს, საღამოს 8 საათზე ტელეკომპანია „ოდიშის“ პირდაპირ ეთერში გავა დებატები „არჩევნები 2017“, სადაც მოწვეული არიან მერობის კანდიდატები „ქართული ოცნებიდან“- ლაშა გოგია, „ნაციონალური მოძრაობიდან“- ლევან კონჯარია, „ევროპული საქართველოდან“- ლელა ქებურია, „პატრიოტთა ალიანსიდან“- გოგიტა ბიგვავა და დამოუკიდებელი კანდიდატი დომენტი (ზვიად) სიჭინავა. კანდიდატებს დებატებზე ინფორმაცია ტელეკომპანიამ დაახლოებით ორი კვირით ადრე მიაწოდა, თუმცა დღეს, დაახლოებით 12:00 საათზე „ოდიშს“ ლაშა გოგიას პრესსამსახურის უფროსი დაუკავშირდა, რომელმაც განაცხადა, რომ გოგია დებატებში მონაწილეობას ვერ მიიღებდა, თუმცა ამის მიზეზები ოფიციალურად არ დაუკონკრეტებია.
ტელეკომპანია „ოდიში“ განმარტავს, რომ დებატები მერობის კანდიდატებს შორის უნდა გამართულიყო 12 ოქტომბერს, თუმცა მაშინაც „ქართული ოცნების“ მერობის კანდიდატის მოუცლელობა და ქალაქში არყოფნა დაასახელა პრესსამსახურმა იმის მიზეზად, რომ ლაშა გოგია დებატებში მონაწილეობას ვერ შეძლებდა.
მერობის სხვა კანდიდატებისთვის ლაშა გოგიას პოზიცია არის მიუღებელი, მათი განცხადებით, სახელისუფლებო კანდიდატს ეშინია პირდაპირ ეთერში უპასუხოს დასმულ შეკითხვებს.