აფხაზეთიდან გადმოსვენებული 25 გმირიდან ოცს დღეს დიღმის ძმათა სასაფლაოზე სამხედრო პატივით დაკრძალავენ, სხვები ახლობლების გადაწყვეტილებით საგვარეულო სასაფლაოებზე და ტაძრებში დაკრძალებიან, მაგალითად უშიშროების პოლკოვნიკი მამია ალასანია სამუდამო განსასვენებელს წმინდა ნიკოლოზის ტაძრის ეზოში ჰპოვებს, აფხაზეთის მინისტრთა საბჭოს წევრის ვახტანგ გეგელაშვილის ნეშტი კი რუსთავში დაიკრძალება.
მანამდე კი, დილის 11:00 საათიდან სამების საკათედრო ტაძარში სამოქალაქო პანაშვიდი მიმდინარეობს.
,,იმ ძმობას, რომელიც საუკუნეების მანძილზე იყო ქართველებსა და აფხაზებს შორის, ვერავინ დაარღვევს, – ამის შესახებ სრულიად საქართველოს კათოლიკოს პატრიარქმა, უწმინდესმა და უნეტარესმა ილია მეორემ სამების საკათედრო ტაძარში ქადაგებისას ბრძანა. უწმინდესმა აფხაზეთში დაღუპული 25 პირის სულის მოსახსენიებელი პარაკლისი გადაიხადა.
"ჩვენ ვლოცულობთ ჩვენი გმირებისთვის. ჩვენ აღვავლენთ ლოცვებს ამარტო ქართველებისთვის, არამედ აფხაზებისთვის. ჩვენი სულიერი ძმები არიან ქართველებიც და აფხაზებიც და სხვანი მკვიდრნი აფხაზეთისა. იმ ძმობას, რომელიც საუკუნეების მანძილზე იყო ქართველებსა და აფხაზებს შორის, ვერავინ დაარღვევს. ჩვენ აღვავლენთ ლოცვებს, რათა განამწესოს ღმერთმა სულნი მათი, სადაცა მართალნი განისვენებენ. ღმერთმა დალოცოს და აცხონოს მათი სულები", – ბრძანა უწმინდესმა.
აფხაზეთის ომის გმირები პრემიერმინისტრმა პრეზიდენტს, სახელმწიფო ჯილდოებზე უკვე წარუდგინა.
