სამეგრელო-ზემო სვანეთის სამხარეო ადმინისტრაციასთან ხუთი წლის წინ გაურკვეველ ვითარებაში გაუჩინარებული გოგიტა აბულაძის მშობლები აქციას მართავენ. ისინი აღნიშნულ საქმესთან დაკავშირებით გამოძიების დასრულებას და სიმართლის გარკვევას ითხოვენ.
აბულაძის მშობლები აცხადებენ, რომ „დღევანდელი ხელისუფლება მათ ატყუებს და ხუთი წლის განმავლობაში საქმეში სიახლე არ არის“.
"ჩემი შვილი სახლიდან სასტუმრო "ანაკლიაში" წავიდა და მას შემდეგ არავის უნახავს. შვილის წერილი გაუჩინარებიდან ორი თვის შემდეგ აღმოვაჩინეთ. წერილში ეწერა: "გადავედი აფხაზეთში ჟენიას შესახვედრად. ამის შესახებ იცის მალხაზ პაჭკორიამ". მალხაზ პაჭკორია სამეგრელოს რეგიონში კონტრდაზვერვის დეპარტამენტის ყოფილი უფროსი იყო, ახლა კი თბილისში მაღალ თანამდებობაზე მუშაობს და სწორედ ის უშლის ხელს გამოძიებას და მან ყველაფერი იცის", – აცხადებს ციალა აბულაძე.
43 წლის გოგიტა აბულაძე 2012 წლის 18 იანვარს გაუჩინარდა. ის სახლიდან სასტუმრო "ანაკლიაში" წავიდა, რის შემდეგაც არავის უნახავს.