ქარიშხალმა ნეიტმა შეერთებული შტატების სანაპიროს მიაღწია. სტიქია ამ დროისთვის ლუიზიანას, მისისიპის, ალაბამასა და ფლორიდის ნაწილს უტევს. რეგიონებში ამ დრომდე გადაუღებლად წვიმს, ქარის სიჩქარე კი საათში 140 კილომეტრს აღწევს.
სტიქიის ზონაში საგანგებო მდგომარეობაა გამოცხადებული. ქარიშხლის გამო, ამერიკულმა კომპანიებმა მექსიკის ყურებში ნავთობისა და ბუნებრივი აირის წარმოება შეაჩერეს, დაიხურა პორტებიც. შეერთებულ შტატებამდე ქარიშხალმა ნეიტმა ცენტრალური ამერიკის ქვეყნებს გადაუარა და 30-მდე ადამიანი იმსხვერპლა.
ტროპიკული შტორმი, სახელად ნეიტი ყარიბის ზღვაში წარმოიქმნა და მექსიკის ყურისკენ დაიძრა- იტყობინება აშშ ქარიშხლების ეროვნული ცენტრი, გზადაგზა მან გრიგალის ფორმა მიიღო და თავის გზაზე მილეწ- მოლეწა სანაპირო დასახლებები, ახლა იგი კონტინენტის ამ მხარეს მდებარე ქვეყნების სიღრმისკენ მიიწევს და ნგრევა, კოკისპირული წვიმები და წყალდიდობები მიაქვს. დღეს ნეიტის მძვინვარების პიკია.
