დღეს და ხვალ თბილისობაა.
წლევანდელი სადღესასწაულო ღონისძიებები დედაქალაქის რამდენიმე ადგილას ლოკაციაზე მიმდინარეობს. საზეიმო ღონისძიებების ძირითადი ნაწილი რიყის პარკში, აღმაშენებლის განახლებულ გამზირზე, ლეღვთახევში და მეტეხის ხიდზე იქნება წარმოდგენილი.
განახლებულ აღმაშენებელზე უკვე იმყოფებოდა დედაქალაქის მერი დავით ნარმანია. როგორც დავით ნარმანიამ ჟურნალისტებს განუცხადა, წლევანდელი ”თბილისობა” სიახლეებით გამორჩეულია.
”წლევანდელი ”თბილისობა” გამორჩეულია დღესასწაულების რაოდენობით და იმ სიახლეებით, რომელიც ტრადიციულ ღონისძიებებთან ერთად არის წარმოდგენილი. მნიშვნელოვანია ის, რომ წელს პირველად, წარმოდგენილი იქნება ჩვენი დაძმობილებული და პარტნიორი ქალაქების პავილიონები”,- განაცხადა ნარმანიამ.
მანვე აღნიშნაა, რომ წლევანდელი "თბილისობის" ყველა ღონისძიებაზე ჯამში მილიონ ლარამდე დაიხარჯება, რაც 270 000 ლარით ნაკლებია წინა წელთან შედარებით.
განახლებულ აღმაშენებელზე ასევე ელოდებიან პრემიერ-მინისტრ გიორგი კვირიკაშვილს და მთავრობის წევრებს.