პარლამენტის განათლების კომიტეტის თავმჯდომარის მოადგილეს გუგული მაღრაძეს არ მოსწონს, რომ ვაშლების პროექტი ყბადაღებულ თემად იქცა.
,,ეს ნაბიჯი გადადგმულია იმისკენ, რომ ცხოვრების ჯანსაღი წესი შევიდეს და დამკვიდრდეს ჩვენს ახალგაზრდა თაობაში. დღევანდელი თაობა ჩემი შვილიშვილების ჩათვლით საერთოდ არ ეკარებიან ხილ-ბოსტნეულს და გადასული არიან „მაკდონალდსის“ მენიუზე. სკოლის ბუფეტებშიც ძირითადად ხაჭაპური და ლობიანი იყიდება.. ასეთ დროს, ბავშვები ერთს რომ დაინახავენ ვაშლს ჭამს, მეორეც შეჭამს და ეს იქნება პატარა ნაბიჯი გადადგმული ჯანმრთელი ცხოვრების წესისკენ.'' ამბობს იგი პრესა გე-სათვის მიცემულ ინტერვიუში.
მისი აზრით ვაშლების დარიგების პროექტი სულაც არ არის ძვირადღირებული ფუფუნება თუნდაც იმ სოციალური პრობლემების ფონზე, რომელიც საზოგადოებას აწუხებს,
,,არაფერი ძვირი პროექტი არ არის, სკოლაში შესატანი ვაშლი ზუსტად ის ფასი ღირს, რაც ბაზარში. როდესაც ჯანმრთელობაზეა ლაპარაკი, არ მინდა სამედიცინო წიაღწსვლებში შესვლა, მაგრამ დღეში ერთი ვაშლით ბავშვები ვიტამინების მიღებას მიეჩვევიან. დამატებითი ღონისძიების გარეშე მშობლები ვერ უზრუნველყოფენ იმას, რომ საჭირო ვიტამინები მიაწოდონ ბავშვებს. სკოლაში კი, ვაშლის ჭამის პროცესი გადამდები გახდება, რასაც შემდგომში სხვა ნაბიჯები მოჰყვება.'' – ამბობს იგი.
საკმარისია თუ არა თბილისის ათ სკოლაში მოსწავლებისათვის კვირაში ერთხელ დარიგებული თითო ვაშლი და ისიც დეკემბრამდე, სრულიად საქართველოს ბავშვების ვიტამინიზაციისათვის და მაკდონალდსისა და მამაპაპური ლობიანას დამარცხებისთვის მომვალი გვიჩვენებს.