ეკატერინბურგის საქალაქო სასამართლომ საერთაშორისო ძებნაში მყოფ 33 წლის უზბეკეთის მოქალაქეს, რომელიც საქართველოს ტერიტორიაზე ადამიანებით ვაჭრობასა და მკვლელობაშია ბრალდებული, პატიმრობა შეუფარდა. ამის შესახებ გამოცემა Znak.com-ს ადგილობრივი პროკურატურის პრესსამსახურში განუცხადეს.
გამოცემის ინფორმაციით, ძებნილი ქალი ეკატერინბურგის პოლიციამ ჯერ კიდევ 23 სექტემბერს დააკავა, ახლა კი, წინასაექსტრადიციო პროცედურები მიმდინარეობს.
Znak.com წერს, რომ უზბეკეთის მოქალაქე 2012-2013 წლებში ბათუმში საკუთარი თანამემამულეების პროსტიტუციით დაკავების იძულებაშია ბრალდებული. ამავდროულად, ქართველი ძალოვნების მტკიცებით, ინტიმური მომსახურების გაწევაზე უარის თქმის შემთხვევაში, ის გოგონებს დასჯით ემუქრებოდა.
გამომძიებლების მტკიცებით, ერთ-ერთ გოგონას მან მუქარა აუსრულა და საკუთარი თანამემამულე მოკლა, რომელიც პოლიციისთვის ყველაფრის მოყოლას აპირებდა.
უზბეკეთის მოქალაქეს საქართველოში ბრალი რამდენიმე მუხლით აქვს წაყენებული და ოცდახუთ წლამდე პატიმრობა ემუქრება.