პრეზიდენტი გიორგი მარგველაშვილი ოფიციალურ ვიზიტად პორტუგალიაში იმყოფება

0
389
საქართველოს პრეზიდენტი გიორგი მარგველაშვილი დღეს ოფიციალური ვიზიტით პორტუგალიის რესპუბლიკას ეწვია. პრეზიდენტის ადმინისტრაციის ცნობით,  ოფიციალური ვიზიტის ფარგლებში, რომელიც ლისაბონში, 1-3 ოქტომბერს შედგება, გიორგი მარგველაშვილი პორტუგალიის რესპუბლიკის პრეზიდენტ მარსელო რებელო დე სოუზას, პრემიერ მინისტრ ანტონიო კოსტას და პორტუგალიის ეროვნული ასამბლეის პრეზიდენტ ედუარდო ფერო როდრიგესს შეხვდება.
 
საქართველოს პრეზიდენტის დახვედრის ოფიციალური ცერემონია ხვალ, ლისაბონში ბელემის სასახლეში გაიმართება. პრეზიდენტები პირისპირ და გაფართოებული ფორმატის შეხვედრების შემდეგ მედიისათვის ერთობლივ პრესკონფერენციას გამართავენ.
 
საქართველოს პრეზიდენტის დელეგაციის შემადგენლობაში შედიან: პრეზიდენტის ადმინისტრაციის უფროსი გიორგი აბაშიშვილი, ეროვნული უშიშროების საბჭოს მდივანი დავით რაქვიაშვილი, საგარეო საქმეთა მინისტრის მოადგილე ვახტანგ მახარობლიშვილი, საქართველოს ელჩი პორტუგალიის რესპუბლიკაში რევაზ ბეშიზე, პრეზიდენტის საგარეო ურთიერთობათა მდივანი თენგიზ ფხალაძე, საპარლამენტო მდივანი ანა დოლიძე, და პრეზიდენტის პოლიტიკური მდივანი ფიქრია ჩიხრაძე.
 
საქართველოს პრეზიდენტი დელეგაციასთან ერთად პორტუგალიის კერძო სამეცნიერო "ფონდ შამპალიმოს" მოინახულებს, რომელიც ნეიროლოგიის, ონკოლოგიისა და კარდიოლოგიის სფეროებში ბიო-სამედიცინო კვლევების მიმართულებით მუშაობს. საქართველოს პრეზიდენტი ოფიციალური ვიზიტის კულტურული პროგრამის ფარგლებში პორტუგალიის უძველესი ხელოვნების ეროვნულ მუზეუმს და გრასას მონასტერს დაათვალიერებს, რომელშიც ქეთევან დედოფლის წამების ამსახველ პანოს გახსნის.
წინა სტატიასვიმონ დადიანის მემკვიდრეებმა მისი ნახატები საქართველოს გადმოსცეს
შემდეგი სტატიათბილისის მერიასთან ,,ნაციონალური მოძრაობის“ მიერ დაგეგმილი საპროტესტო აქციის მონაწილეები იკრიბებიან
ტელეკომპანია ოდიშის საინფორმაციო სამსახური