.ევროპელი მიმომხილველები მიიჩნევენ, რომ „კატალონიელ სეპარატისტებს“ , შესაძლოა, რუსეთი ეხმარებოდეს.

 

როგორც ”ამერიკის ხმის” ქართული ბიუროს მიერ გამოქვეყნებულ სტატიაშია აღნიშნული, კატალონიის დამოუკიდებლობის მომხრე პოლიტიკოსი ენრიკ ფოლკი, რომელიც კატალონიის სოლიდარობის პარტიის საერთაშორისო მდივანია, რუსულ მედიასთან ინტერვიუში აცხადებს, რომ დამოუკიდებელი კატალონია მსოფლიო ფორუმებზე რუსეთის მოკავშირე იქნება და აფხაზეთისა და „სამხრეთ ოსეთის“ დამოუკიდებლობასაც აღიარებს.

 

”ესპანეთის ცენტრალურმა ხელისუფლებამ შესაძლო არეულობათა თავიდან ასაცილებლად კატალონიაში ათასობით პოლიციელი მიავლინა. ის ადგილობრივი ხელისუფლების წარმომადგენლებს, რომლებმაც რეფერენდუმს დაუჭირეს მხარი, უმკაცრესი ჯარიმებითა და დაპატიმრებით დაემუქრა.

პოლიციის გადამეტებული სიმკაცრის მიუხედავად, შეერთებული შტატები და ევროკავშირის სახელმწიფოთა უმეტესობა ესპანეთის პრემიერ მარიანო რახოისა და ქვეყნის ერთიანობას უჭერენ მხარს.

 

რუსული სახელმწიფო მედიის სიმპათიები კი ცალსახად კატალონიის დამოუკიდებლობისაკენ იხრება. მიმომხილველები ეჭვობენ, რომ კატალონური სეპარატიზმის ფარული მხარდაჭერა მოსკოვის მორიგი მცდელობაა, დააზიანოს ერთიანი ევროპის იდეა.

ოფიციალური კრემლი კატალონიის ამბებს არ ეხმაურება და ამბობს, რომ ის ესპანეთის საშინაო საქმედ მიაჩნია”, – ნათქვამია სტატიაში.

 

კატალონიაში ჩატარებული რეფერენდუმის მონაწილეთა 90%-მა,  2 მილიონმა ამომრჩეველმა რეგიონის ესპანეთის შემადგენლობიდან გასვლას დაუჭირა მხარი, რეფერენდუმში მონაწილეობა 2,26 მილიონმა ადამიანმა მიიღო, რაც ამომრჩეველთა სრული რაოდენობის (5,34 მილიონი) 42,3%-ს შეადგენს.