ბათუმის საკრებულო გეგმავს რომ ბათუმის ბოტანიკურ ბაღთან მწვანე კონცხის ნაწილი და მიმდებარე სანაპირო 49 წლიანი იჯარით გადასცეს „პანორამა ბათუმს“ ანუ ბიძინა ივანიშვილს.
საკრებულოს ოპოზიციონერი დეპუტატების ინფორმაციით, ბიძინა ივანიშვილისთვის მიწის გადაცემის საკითხზე მსჯელობა დღევანდელ რიგგარეშე სხდომაზეა დაგეგმილი, მათივე ინფორმაციით, ტერიტორიის პირდაპირი წესით გადაცემაზე თანხმობა აჭარის მთავრობამ უკვე განაცხადა.
"თითქმის დარწმუნებული ვარ, რომ საკრებულოს უმრავლესობა ვერ გაუძლებს ამხელა წნეხს და ისინი მხარს დაუჭერენ იმას, რომ ბიძინა ივანიშვილის პრინციპში საკუთრებაში გადასცენ ბოტანიკური ბაღი. თბილისი პანორამის მსგავსად, ალბათ ჩვენ გვექნება ბათუმი პანორამა და ისევე როგორც ბიძინა ივანიშვილმა თბილისის ბოტანიკური ბაღი შეიერთა, რეალურად, უნიკალური ბათუმის ბოტანიკური ბაღი იქნება მისი სასტუმროს ეზო. ეს ყველაფერი მიგვიყვანს იქამდე, რომ ბათუმელებისთვის, ბათუმის სტუმრებისთვის ბოტანიკური ბაღი გახდება მიუწვდომელი, ის რეალურად იქცევა ბიძინა ივანიშვილის ეზოდ." -განაცხადა "ერთიანი ნაციონალური მოძრაობის" ბათუმის რაიონული ორგანიზაციის თავმჯდომარემ გიორგი კირთაძემ.