საქართველოს პრეზიდენტი გიორგი მარგველაშვილი მოსწავლეებსა და სტუდენტებს ახალი სასწავლო წლის დაწყებას ულოცავს.
„გულითადად გილოცავთ ახალი სასწავლო წლის დაწყებას. დღეიდან იწყება ცოდნის, ახალი გამოცდილების, ახალი მეგობრების შეძენის პროცესი, რომელიც განსაკუთრებით მნიშვნელოვანია მათთვის, ვინც დღეს პირველად შეაღო სკოლისა და უნივერსიტეტის კარი.
მჯერა, რომ თითოეული მათგანი, გაათმაგებული ენერგიითა და შემართებით შეუდგება ცოდნის გადაცემისა და დაუფლების პროცესს, რომელიც არსებითია საზოგადოების განვითარებისთვის.
სწორედ თითოეული მოქალაქის ინტელექტითა და შესაძლებლობების გამოყენებით უნდა ავაშენოთ ძლიერი ქვეყანა.
კიდევ ერთხელ გილოცავთ და გისურვებთ წარმატებებს შემდგომ საქმიანობაში“, – ნათქვამია პრეზიდენტის მილოცვაში.
დღესვე პრეზიდენტის ადმინისტრაციის ხელმძღვანელი საოკუპაციო ხაზთან ახლოს, სოფელ ბერშუეთში ჩავიდა, მოსწავლეებს სწავლის დაწყება მიულოცა და პრეზიდენტის სახელით საჩუქრები გადასცა.
ბერშუეთის ამ ერთადრეთ სკოლაში 6 პირველკლასელია და სულ 126 მოსწავლე.
„მნიშვნელოვანია, როდესაც ვხედავთ სკოლის მოსწავლეები ოკუპირებული ხაზიდან როგორი შემართებით არიან, როგორ გვაჩვენებენ თითოეულ ჩვენგანს, მართლაც გმირობის მაგალითს, როგორ გვაჩვენებენ თითოეულ ჩვენგანს, რომ რეალურად ძალა არის განათლებაში,“ – განაცხადა გიორგი აბაშიშვილმა.