ელიავას ბაზრობა სხვა ტერიტორიაზე, შესაძლოა, აღარ გადაიტანონ. ელიავას ბაზრობის ერთ-ერთი მეწილე, ზაზა მეტრეველის განცხადებით, ბაზრობის ხელმძღვანელობას თბილისის მერი დავით ნარმანია შეხვდა და დაჰპირდა, რომ ბაზრობას სხვა ტერიტორიაზე არ გადაიტანენ.
იგი მათ ასევე დაჰპირდა, რომ ტერიტორია ისე შეიცვლება, რომ არც ბიზნესი დაზარალდეს და მოსახლეობაც კმაყოფილი იყოს. – კერძოდ, ტერიტორიის გამწვანება ბაზრობის გადატანის გარეშე განხორციელდება.
15 აგვისტოს გამოქვეყნებული კვლევის თანახმად, ხე-მცენარეების ამ ტერიტორიაზე გასაშენებლად საჭირო იქნება ქვა-ღორღის და სამშენებლო მასალის გატანა ტერიტორიიდან და ამის შემდეგ ახალი ნიადაგის დაყრა ფართობზე.
თბილისის გენერალური გეგმის მიხედვით, ე.წ. ელიავას ბაზრობის ტერიტორიაზე სარეკრეაციო ზონა უნდა მოეწყოს.